هەرخوێن بەس نیە.....!! 

18 شوبات 2017

ن: عەبدولواحێد محەمەد

لە حوزەیرانی (2014) كە تیرۆرستانی داعش كوللە ئاسا رویان لەم وڵاتە كرد، ئیتر كێ دروستی كردن؟ كێش هێنانی؟ ئەوە مەسەلەیەكی ترە وردەكاری زۆری دەوێت ، هەموو شتێكی جوانیان ناشرین كرد ، هەرچی پەروەردەگار و مرۆڤایەتی نەفرەتیان لێكردووە كردیان، كوشتن، سەربڕین، هەتككردن، تێكدانی مەزاری ئایینی، خاپووركردنی شوێنەواری مێژویی، لە گرێژنەبردنی شیرازەی كۆمەڵایەتی، بڕوای تەواوم بەوە هەیە ئەگەر گەلی كوردستان و هێزی پێشمەرگە و گەریلا و شەڕڤانان نەبوونایە دەیان كردینە ئاردی ناو دڕك، ئەوانە خۆیان كردە قۆچی قوربانی و خوێنیان كردە سور خەلاتی گەل، ئەوەتا خەریكی دواپاڵن بۆ ئەوەی بیان خەنە ناو گوڕە دۆزەخیەكانیان، لەبەرامبەر ئەو ئازایەتیەی پێشمەرگە و شەڕڤانان هەموو كوردێكی دڵسۆز و بەشەرەف ئەركیەتی ئەكەر راستەوخۆش لەبەرەكانی روبەڕوبوونەوە نەبێت، بەرەكانی دواوە بەهێز بكات و بەردەوام لە خەمی پێداویستیەكانی ماڵ و منداڵ و كەس و كاریان دابێت، زۆر گرنگە كاتێك هێزی پێشمەرگە خوێن لە بەدەنی دەچۆڕێت، كۆمەڵانی خەڵك قەرەبووی ئەو خوێنە بە خوێنی خۆیان بكەنەوە، واتە بەشداری راستەقینە بكەن لە هەر ئەزیەت و ئازارێك بەر ئەو كوڕە ئازا و جەسورانە دەكەوێت، چونكە بەوانەوە ئێمە سەربەرز و پارێزراوین، ئەوەتا لە دەشتی نەینەوا و دەوروبەری موسڵ بەور ئاسا ناوچە كوردستانیەكان رزگار دەكەن، لە كەركوكی كوردستانیش دەرسێكی ئەو تیرۆرستانەیان دا هەتا هەتایێ لە بیری نەكەن و ببنە پەند و عیبەرەتیش بۆ ئەوانەی دروستیان كردن هەروەها ئەوانەشی دەنە و داڵدەیان بدەن، لەم سەروبەندەدا زۆر گرنگ بوو مامۆستایان و فەرمانبەران هەڵمەتی خوێن بەخشینیان كرد، دەستیان خۆش و خوێنیان گەشاوەبێت، بەڵام هەر خوێن بەس نیە توانا بەخشینش پێویستە، بەدەر لەوەی حكومەتی هەرێم چەندە كەمتەرخەم و خەمساردە بەرامبەر بە پرۆسەی پەروەردە و خوێندنی باڵا لەرابردووە تا هەنوكە بەتایبەت لەبارەی موچەوە كە دوو ساڵ زیاترە مامۆستایان بە دەستیەوە گیرۆدەن، بە دیاریكراوی دوای پیادەكردنی ئەو سیستەمە ناڕەوا و تاقەت بڕوكێنە، لەروانگەی ئەوەی پرۆسەی پەروەردە و فێركردن فاكتۆری بنەڕەتی و ژیاری كۆمەڵگەی تەندروستە، ناكرێت و نابێت لە ژێر هیچ پاساوێكەوە پەك بخرێت، راستە و دووپاتی دەكەمەوە حكومەت كەمتەرخەمە رەنگە هەندێك خوێندنەوەش بۆ ئەوە حاڵەتە نەخوازراوە هەبێـت كەوا بەمەبەست كار بۆ ئاڵۆزبوون و پەكخستنی برۆسەی پەروەردە و خوێندنی باڵا دەكرێت، بۆیە ئەوە دەبێت هانمان بدات و پاڵمان پێوەبنێت بە هەموو شێوەیەك رێگری لەوە بكەین و نەهێڵین ئەو مەرامەی ئەگەری هەیە و دەوترێت سەربگرێت ، راستە خوێن بەخشین بۆ پێشمەرگە گرنگە بەڵام لە خوێن گرنگتر ئەوەیە نەهێڵرێت منداڵەكانیان بێناز و لە زانست و زانیاری و ئەلف و مەعریفەتدا بێبەشبن، ئەوەی دەڵێت ئەوەیان پێویست نیە، ئەی ئەوە نیە ئەوان سینگی خۆیان كردۆتە قەڵغانی گوللە و ئێمەش لەناو بێخەفە گەرم گوڕەكان پاڵدەدەینەوە، خۆ ئەگەر ئەوان نەبن ئەوا ئێمەش وێل و هەردەی ئەملاو ئەولا دەبین، ئەوە نیە بە هەزاران هەزار ئاوارە لە بن خێمە و لەناو كەرەڤان و لە سادەترین سەرەتاكانی ژیان بەهرەمەند نین، هەرگیز نابێت لەبیرمان بچێت سەرەتا كە داعش هات زۆربەی هەرە زۆری ئەم خەڵكە لە ترسی گیانی خۆی و ناموسیان بارگەیان تێكنابوو بۆ رێگای هات و نەهات، هەر بۆیە دەبێ‌ نازی پێشمەرگەكانمان هەڵگرین با لێنەگەڕێین كەس و كاریان فەرامۆش بكرێن با دەرس بە منداڵ و رۆڵە چاوگەشەكانیان بدەینەوە هەر ئەوەش قەرەبووی خوێن و ئازار و شەونخونیان دەكاتەوە، سەرەنجام كە ئەوان لێناگەڕێن سەنگەرەكانی روبەڕوبوونەوەی داعش چۆڵ بن دەبا ئێمەش سەنگەرەكانی پەروەردە برەو پێبدەین تا تاریكی باڵ نەكێشێت و خەونی تاریك پەرستان لەنەمان عیلم و مەعریفەتدا بەجێ نەیێت .