تەنها شەممەكان بكرێتە پشو....!!

25 ئاب 2017

ن:عەبدولواحێد محەمەد
       پێش سەرهەڵدانی قەیرانەكانی هەرێم، واتەپێش ساڵی (2014) بەردەوام جەختمان لەسەر ئەوە دەكردەوە، ماوەی ساڵی خوێندن بە پێی پێویست نیە و تێرایی ئەو پرۆگرامانە ناكات كە لە پرۆسەی پەروەردەدا خراوەتە بەر خوێندن و فێربوون، هەر ئەو پرۆگرامانەی لێرە دەخوێندرێت لە وڵاتانی، میرنشینی عەرەبی یەكگرتو، لوبنان، بەرازیل، چەند شوێنێكیتر، ((34)) هەفتەی خوێندن كە دەكاتە (900) كاتژمێر، بۆی فەراهەم كراوە، لە ژێر رۆشنایی ئەو راستیەی پرۆگرامەكان چەند زەمەنی پێویستە بۆ تیۆری ئەوەندەشی پێویستە بۆ پراكتیكی، هەرگیز لایەنێكی پرۆسەكەیان لەسەر حسابی لایەنەكەیتر فەرامۆش نەكردووە و نایكەن، لەگەڵیشدا تەكنەلۆژیای تازە دەڕەخسێنن و  راهێنانی بەردەوامیش  بە مامۆستا دەكەن، بۆ ئەوەی پرۆسەی پەروەردە و فێركردن ئامانجە بونیادیەكانی خۆی بپێكێت، ئەمە لە كاتێكدا لە لای ئێمە لەوەتەی كاریان پێدەكرێت ماوەی خواستراوی بۆ فەراهەم نەكراوە، باشترین ساڵ  لە چاو ساڵەكانی خوێندن دەكرێت ئاماژەی پێبدەین ساڵی خوێندنی (2012 - 2013) بووە ئەویش تەنها ((133)) رۆژ دەوامی خوێندن كراوە كە دەكاتە دەوروبەری (500) كاتژمێر، ئەو خەوشە ئاشكرایە لە رۆژ و كاتژمێرەكانی خوێندن ئەوەمان پێدەڵێت، پرۆسەكە لەسەر راستەرێی خۆی نەبووە و بەكەمو كوڕیەوە بەڕێوەچوە، بەدیوكیتر ئەوەمان بۆ ساغ دەبێتەوە لایەنی پراكتیكی لەسەر حیسابی لایەنی تیۆری فەرامۆش كراوە، لەهەمان كاتیشدا چالاكیە جۆرەجۆرەكانیش زۆر سنوردار بووە، ئەو شێوە بەڕێوەچونە خۆی لەخۆیدا بازنە بەندیەكی داخراو بووە  لەبەر دەم خوێندكاران و قوتابیان، واتە زانیاری و زانستی پێویست بە پاراویەوە نەگەیشتۆتە زهینەتیان، ئەو كاتە ئێمە بەداتا و ئامار ئەو خەوشە رون و ئاشكرایەمان خستە بەردەم لایەنە پەیوەندیدارەكان، هاوكات هۆكارەكانیشمان بۆ رونكردنەوە كە هەر سەرەكیان زۆری بەخشینەوەی پشو بوو، لەگەڵ هەر پشوەكیشدا پێشگر و پاشگر و ناوەخنیشیان هەبووە،  ئەم خستنە روە،   بۆ پێداگرتن بووە  لەسەر ئەوەی دەبێت ساڵی خوێندنی پڕ بە پێستی بێت،  لەمبارەیەوە دەبێت پشوەكان زۆر كەمبكرێتەوە و خشتە بەندیەكی تایبەتیش بۆ هەردوو وەزارەتی پەروەردە و خوێندنی باڵا هەبێت. ئەوسا هەوڵێك درا، بەقۆناغ كاتژمێرەكانی خوێندن زیادبكرێت، بەڵام سەرهەڵدانی قەیرانەكان، سەرەتا داعش و پاشان ئاوارە و لەساڵی خوێندنی (2014-2015)ەوەش قەیرانی دارایی، هەموو هەوڵەكانی خستە ناو لەپی عفریتەوەو لە جێدا سیخناخی كرد، ئیتر لەوساوە پرۆسەی پەروەردە لەگەڵ بەڕێوەچونی توشی سەد دەرد بووە و چەندین مۆدێلی نەخوازراویش بەرۆكی گرتۆتەوە، بەدیاریكراوی دوای بڕیاری پیادەكردنی پاشەكەوتی زۆرەملێ، ناچمەوە سەر كاردانەوەكان چونكە زۆری لەسەر وتراوە، ئەوەی لەم وتارەم دەمەوێ ئاماژەی پێبدەم داهێنانی چەندین شێوازە لەدەوامكردن كە بۆ هەر فەرمانگە و دەزگایەكی خزمەتگوزاری ئاسایی بێت، نابێت و ناكرێت لە پەروەردەو خوێندنی باڵا بكرێت، چونكە لە بنەڕەتدا:
1-    پرۆسەكە مامەڵەكردنە لەگەڵ نەوەكان كە هیچ گوناهیان نیە لە دروست بوونی ئەو قەیرانانە و قابیلی قبوڵ نیە ئەوانە باجەكەی بدەن.
2-    هاوكات مامەڵەكردنە لەگەڵ زانست و مەعریفەت، بۆ ئەوەی بەتەواوی بەهرەمەندبن لێی كۆمەڵێك بنەمای جێگیری هەیە دەبێت  فەراهەم بێت لەپێشەوەیان، ماوەی پێویست بۆ خوێندن لەهەموو قۆناغەكان، جێگای نیگەرانی  قوڵە، بەهۆی هەڵپەساردنی دەوام و پیادەكردنی دەوامی ئارەزوومەندانە كە خۆی لە دوو رۆژ و سێ رۆژ پشو و كەمكردنەوەی كاتژمێرەكانی خوێندن و كورتكردنەوەی بەشەوانەكان دەنوێنێت، وای لێهاتوە تێكڕای رۆژەكانی خوێندن لە (100) رۆژ تێپەڕ نەكات كە دەكاتە دەوروبەری (400) كاتژمێر، واتە رێك نیوەی ماوەی پێدراوی ساڵی خوێندن، لێرەدا دوو پرسیار دێتە پێشەوە، یەكەمیان ئایا ئەو ساڵە و ئەو شێوە خوێندنە سودی دەبێت؟ بێگومان نەخێر و هەزار نیشانەی پرسیاریش لەبەرامبەری، دەرەنجامەكەی لەئێستادا هەستی پێناكرێت، بەڵام لەساڵانی ئایندەو لە داهاتو دەبیننەوە چەند بەسوێیە، لە پەروەردەكارە شارەزاكانمان بیستۆتەوە كە زەعیمی نەمر عبدالكریم قاسم ساڵی خوێندنی (58-59)ی كردۆتە ساڵی پەڕینەوە لەخوێندن چەندین ساڵ دواتر بەردەوام پرۆسەی پەروەردە باجی داوە و كاریگەری نەرێنی بە كۆی پرۆسەكە و قوتابیان خوێندكارانەوە دیاربووە، كەوایە هیچ شكی تێدانیە ئەو بارە لارەی ئێستا، لە ئایندەدا دەبیننەوە چ لێكەوتەی خراپی لێدەكەوێتەوە،پرسیاری دووەمیش، كێ بەرپرسە لەم بارودۆخە؟دیارە ئەگەر بەشێكی بەرهەمی قەیرانەكان بێت، بەڵام بەشی شێری لە ئەستۆی حكومەتە نابێت چاو لە ئاست ئەو شڵەژاویە بنوقێنێت و درێژەبكێشێت، بە پێچەوانە  دەبێت چارەسەری بكات بەمشێوەیە:
1-    بەهەر شێوەیەك بێت، دەبێت باروگوزەرانی مامۆستایان باش بكرێت و پێویستیەكان ئەو پرۆسەیە، لەماوەی پێویست، مامۆستای باش، راهێنانی بەردەوام، تەكنیكی تازە بڕەخسێنێت.
2-    وەزارەتی پەروەردە وەك چارەسەری بنەڕەتی بۆ ئەو فرە داهێنانە نەخوازاراوانە  لە ئۆف و پشوی ئارەزومەندانە، بڕیاری ئەوە بدات تەنها شەمەكان بكرێتە پشو و بۆ هەموو قۆناغەكان هاوتای عێراق و توركیا و زۆربەی وڵاتان، بەمەرجێك بەپشو كردنی ئەو رۆژە لەسەر حیسابی پرۆسەی خوێندن نەبێـت، بەلكو لەكەمكردنەوەی پشوەكانی ساڵ و چەند رۆژێك درێژكردنەوەی ساڵی خوێندن قەرەبوو بكرێتەوە، بەپێچەوانە ئەوەی لە دوو ساڵی رابردوودا كە زۆر بەكاڵ و كرچیەوە بووە ئەگەر فریای نەكەون ئەوەندەش نامێنێت، ئیتر دوای ئەوە هەرچی بكرێت پرۆسەكە ناكەوێتەوە سەر شاڕێگەی خۆی.