یەكێتی مامۆستایانی كوردستان لەگەڵ بەڕێز وەزیری پەروەردە كۆدەبنەوە

27 تەمموز 2017

   بەمەبەستی گفتوگۆكردن لەسەر كۆمەڵێك پرسی پەروەردەیی گرنگ، وەفدێكی یەكێـتی مامۆستایانی كوردستان كە پێكهاتبوو لە سەرۆك و جێگرو ژمارەیەك لە ئەندامانی مەكتەبی سكرتاریەت سەردانی وەزارەتی پەروەردەیان كرد، لەلایەن بەڕێز وەزیری پەروەردەوە  بەگەرمی پێشوازیكران، پاشان لەكۆبوونەوەیەكی هاوبەشدا وێڕای بەرزنرخاندنی سەركەوتنی پرۆسەی ئەزمونەكان كە خۆی لەخۆیدا دەسكەوتێكی گەورەیە بۆ هەموو لایەك بەتایبەتی لەم ساڵی خوێندندا كەبە ماندووبونێكی زۆر گەیشتە دوا قۆناغ ، دەست خۆشیش لە وەزارەت لەمەڕ كۆمەڵێك رینمایی و بڕیار كرا كە بەمدواییە لە بەرژەوەندی هەڵگرانی بڕوانامەی خوێندنی باڵا ( ماستەر- دكتۆرا)، سەرپەرشتیاران، كرێی وانەبێژی، پێدانی جیاوكاری بڕوانامەی بەكالۆریۆس بەدەرچوانی پەیمانگای راهێنان و گەشەپێدان راگەیاندرا، لەدرێژەی كۆبوونەوە هاوبەشەكە جەخت لەسەر ئەوە كرایەوە كە دەبێت دەسكاری پاشەكەوتی موچە بكرێت بۆ ئەوەی ساڵی تازە بەباشی بەڕێوەبچێت، لەهەمان كاتیشدا داواكرا دەرماڵەی هاندان  بەردەوام بێت و بەڕێكوپێكی بدرێت، داواشكرا بایەخ بەمیلاكی پێویست بدرێت بۆ ناوەندەكانی خوێندن هەروەها دابینكردنی پرۆگرامەكانی خوێندن بۆ قوتابیان و خوێندكاران، كۆمەڵێك بابەتیتریش وەك هەژماركردنی مۆڵەتی بێموچە بەخزمەت و هاوتاكردنی وەك فەرمانبەرانیتری دەوڵەت، لە بەشێكیتری كۆبوونەوەكە هەڵوێستە لەسەر خوێندنی كوردی و گرفتەكانی لەكەركوك كرا پێداگیریش لەسەر ئەوەكرایەوە كە دەبێت دەرچوانی كۆلێژی كراوە بڕوانامەكانیان هاوشێوەی هاوەڵەكانیان هاوتا بكرێت كە مافێكی سروشتی خۆیانە، جەختیش كرایەوە زۆر گرنگە لە كۆبوونەوەی داهاتووی بۆردی پەروەردە و خوێندنی باڵا باس و راسپاردەی گونجاوی بۆ دەربكرێت، ئەمە و لەكۆتایی كۆبوونەوە تەئكید لەسەر ئەوە كرایەوە هەروەك لە رابردوودا هاوكاری تەواو هەبووە بۆ سەرخستنی پرۆسەی پەروەردە لێرەش بەدواوە هەر بەو شێوەیە دەبێت بەتایبەت لەباشكردنی رەوشی ژیانی مامۆستایان و دابینكردنی پێداویستیەكانی پرۆسەی پەروەردە و فێركردن .