بەمەبەستی بەدواداچون بۆ كۆمەڵێك پرسی پەروەردەیی، وەفدێكی مەكتەبی سكرتاریەتی (ی.م) كە پێكهاتبوو لە سەرۆك و هەردوو جێگر و ژمارەیەك لە ئەندامانی مەكتەب، دوو شەممە رێككەوتی (3/4/2017) لەدیوانی وەزارەت بە ئامادەبوونی بەڕێوەبەری گشتی فێركردنی ئامادەیی و پیشەیی، بەڕێوەبەری گشتی پلان دانان، بەڕێوەبەری گشتی پێشوی پەروەردەی سلێمانی، كۆبوونەوەیەك ئەنجامدرا، لە كۆبوونەوەكەدا سەرەتا بەڕێز وەزیری پەروەردە كورتە باسێكی لەمەڕ سەفەرەكەی ئەمدواییەی بۆ كۆبوونەوەی یونسكۆ لە پاریس پێشكەشكرد، هەروەها كۆمەڵێك بابەتی تریشی خستەڕو، لە لایەن خۆیەوە بەڕێز سەرۆكی (ی،م) تیشكی خستەسەر چەند بابەتێكی گرنگ، بۆ ئەوەی گفتوگۆی لەبارەیەوە بكرێت لەوانە: - 

1- دوا بڕیاری وەزارەتی خوێندنی باڵا و توێژینەوەی زانستی لەمەڕ سەرپشككردنی دەرچوانی قۆناغی دوازدەی ئامادەیی لە هەژماركردنی یان نەكردنی هەردوو بابەتی كوردی و عەرەبی بۆ وەرگرتن، لەبەشە پزیشكی و ئەندازیاری و زانستیەكان، لەمبارەیەوە بەباش زانرا ئەم بابەتە لێوردبوونەوەی زیاتری لەسەر بكرێت، بەجۆرێك هەموو لایەنە پەیوەندیدارەكان رێكبكەون لەسەر ئالیەتێك كە لە بەرژەوەندی گشتیدابێت . 

2- دەرماڵەی هاندان، جەخت كرایەوە لەسەرئەوەی دەبێت بەزوترین كات دابەش بكرێت و ئەو گرفتانەی لە پێدانی مانگی پێشو هەبوو چارەسەر بكرێن . 

3- بەهەموو شێوەیەك هەوڵ بدرێت دۆخی پەروەردە لەو بارودۆخە ناتەندروستەی پیادا تێپەڕدەبێت رزگار بكرێت بەتایبەت بۆ ساڵی ئایندە، لەمبارەیەوە بە گرنگ زانرا حكومەت دەبێ هەنگاوی جددی هەڵبهێنێت بۆ چاكردنی باروگوزەرانی مامۆستایان و كارمەندان لەهەردوو وەزارەتی پەروەردە و خوێندنی باڵا. 

4- بەبەرنامە هەوڵ بدرێت ئەو حاڵەتە نەخوازراوانەی لێرە و لەوێ لەنێوان مامۆستایان و خوێندكاران رودەدات، بەزوترین كات چارەسەر بكرێن، بۆ ئەوەی لە راگەیاندنەكان نەكرێنە بابەت و گەورە نەكرێن، بەپێویستیش زانرا لەهەر لێكۆڵینەوەیەكی لەو شێوەیە (ی.م) قسەی خۆی هەبێت . 

5- لەبارەی دەرچوانی كۆلێژی پەروەردەی كراوە، جەخت لەسەر ئەوە كرایەوە كە دەبێت هەموو هەوڵ و رێكارێك بگیرێتەبەر تاوەكو ئەو گرفتە درێژخایەنە لە بەرژەوەندی ئەو بەڕێزانەی كە هەڵگری ئەو بڕوانامانەن یەكلابكرێتەوە . 

ئەمە و كۆمەڵێك بابەتیتر قسە و باسیان لەبارەیەوە كرا، تەئكیدیش لەسەر ئەوەكرایەوە كە دەبێت هەر دوو وەزارەتی پەروەردە و خوێندنی باڵا و یەكێتی مامۆستایان، هاوڕا و هەماهەنگ بن بۆ بەرجەستەكردنی باشترین بەرنامە بۆ بەڕێوەچونی پرۆسەی پەروەردە و خوێندنی باڵا بەهەموو جومگەكانیەوە . 

 

ن: عەبدولواحێد محەمەد

ماوەیەك بەر لە ئێستا شێخ محەمەد كوڕی راشد ئال مەكتوم كە جێگری سەرۆكی میرنیشنی یەكگرتوی عەرەبی و سەرۆكی ئەنجومەنی وەزیران و فەرمانڕەوای دوبەی، داخوازی بۆ دامەزراندنی فەرمانبەرێك بەم مەرجانە راگەیاند : - 

1- ئامادەی تەواوی لەخۆ تەرخان كردن بۆ خزمەتی خەڵك هەبێت . 

2- شارەزایی هەبێت بەشێوەیەك كەمتر نەبێت لە هەڵمەتێكی خۆبەخشی خێرخوازانە یان كارێكی مرۆڤانەی تایبەت بە هەوڵدان بۆ دڵخۆشكردنی هاوڵاتیان . 

3- ناو و ناوبانگی لەناو كۆمەڵانی خەڵكدا باش و رەوشت بەرز و مرۆڤ دۆستانە بێت . 

4- دەبێت هەمیشە لایەنی چاكەی هەبێت و باوەڕی تەواوی بە هێز و توانای دەوروبەر و هاونیشتمانیان هەبێت . 

5- تەمەنی لەنێوان (5 بۆ 95) ساڵ بێت . 

ئەم مەرجانەی ئەو پیاوە رایگەیاندووە بۆ دامەزراندنی فەرمانبەرێك، رەنگە لەخوێندنەوەی هەندێك جێگای هەڵوێستەكردن یان جۆرێك لە نمونەیی بوونی تێدا بێت، بەڵام بەدڵنیاییەوە زۆربەیان دەقا و دەق راستی تێدایە، بە بەڵگەی ئەوەی ئەو وڵاتۆكە (30-40) ساڵێك بەر لە ئێستا لمستان بوو، كەچی هەنوكە لەریزی پێشەوەی جیهانیدایە ، بێشك هزرو بیر و تێفكرینی ئەو شێخە و شێخەكانیتر كە بونیادی لەسەر خزمەتكردنی گەل و وڵات هەڵچنراوە، وایكردووە بگەنە كەشكەڵانی فەلەك، هێشتاش دڵیان ئاوی نەخواردۆتەوە و پێش بڕكێیانە لەگەڵ زەمەن بۆ ئەوەی بەردەوام لە ركێفی پێشكەوتنی جیهانیدا دانەماڵێن، بە راستی ئەو بنەمایانەی لەسەرەوە ئاماژەیان پێدراوە بۆ دامەزراندن، یان ئەو هزر و بیرەی ئەو هەموو شارستانیەت و پێشكەوتنەیان داهێناوە شایەنی چاولێكردنن، چونكە كاتێك بەراوردی نێوان خۆمان و ئەوان دەكەین، ئێمە لە زۆر بواردا لەوان دەوڵەمەندترین، وەك توانای مرۆیی، سەرچاوەی سروشتی، خاكوخۆڵی بە پیت و بەرەكەت، ئاووهەوای چوار وەرزە، ئیتر دەبێ‌ پرسیاری ئەوە بكرێت، گەلۆ كێشەكە لە چیدایە، وایكردووە سەرباری ئەو هەموو فاكتۆرە گرنگانە ، هێشتا هەنگاوە سەختەكان نەبڕدرێت؟ بە گۆڕیە بایەكی گەرم و زەنە بەفرێك لەرزەلەرزەمان لێبێت و لێوەكانمان تەتەڵە بكات، وەك ئەوەی ئێستا تیایداین و بینا قاقای هەمومانی گرتوە، بێگومان هۆكارگەلێك هەن لە هەمویان گرنگتر لە زۆر جومگەی گرنگی ئەم وڵاتە نەتوانراوە كەسانی شیاو بۆ شوێنە شیاوەكان دابنرێت، ئەمەیان بەرپرسە باڵاكان ئۆباڵەكەی لە ئەستۆ دەگرن لەبەر ئەوەی نەیان توانیوە خۆیان لە جغزی حزبایەتی یان لاگیری و میانگیری و خزمایەتی، بنەمای ئەوەی لەبەر چاوانە لەبەر دڵانە رزگاربكەن ، یەقینیشم وایە وا بە ئاسانیش ناتوانن دەست بەرداری بن، بۆیە رۆژ لە دوای رۆژ پرۆسەی بەڕێوەبردن بەرە و داكشان دەڕوات، لەوەش خراپتر ئەوەیە درێژەی پێبدرێت و ببێتە هۆكار بۆ داخوراندنی كۆی پەیكەری دەوڵەت، دواجاریش كار بگاتە ئەوەی تێكڕای هاوڵاتیان بەبێ جیاوازی باجەكەی بدەن كە لە ئێستادا لە لێوارەكەیدایە، ئەم بارودۆخە شپرزەیە چاوخشاندنەوەیەكی جددی و لێبڕاوانەی بەتەواوی جومگەكانەوە دەوێت، رەنگە ئەو پرۆسەیە لەزەرفێكی وادا گران بێت چونكە زۆر بارگاوی بووە لەگەڵ ئەوەشدا دەكرێت لێرەوەڕا دەست پێبكرێت و ئەو بنەمایانەی شێخ محەمەدیش سودی لێوەربگیرێت . 

لە چوارچێوەی چالاكیەكانی یەكێتی مامۆستایانی كوردستان بۆ بەرز راگرتنی رۆژی جیهانی ژنان ، لقی راپەڕین كۆمەڵێك چالاكی بەڕێوەبرد ، بۆ ئەو مەبەستە وەفدێكی لق كە پیئكهاتبوو لە سەرۆك و ژمارەیەك لە ئەندامانی لق لە هەردوو دەڤەری رانیە و پشدەر سەردانی كۆمەڵێك ناوەندی خوێندن و باخچەی ساوانیان بەسەركردەوە و هاوكاری و رێزلێنانیان پێشكەش بە ژمارەیەك مامۆستای ژن كرد كە رۆڵیان هەیە لە بواری پەروەردەو مافەكانی ژنان ، ئەمە و سەردان و رێزلێنانەكان بووە جێگای دەست خۆشی.

بە مەبەستی بەرز راگرتنی هەشتی ئادار كە دەكاتە رۆژی جیهانی ژنان ، لقی خانەقینی یەكێتی مامۆستایانی كوردستان بە هاوكاری یەكێتی ژنان و ئافرەتان كۆمەڵێك چالاكی جۆراجۆریان ئەنجامدا لەوانە سەردانی چەندین ناوەندی خوێندن هەروەها رێورٍەسمی رێزلێنان لە ژمارەیەك مامۆستا و بەڕێوەبەر كە رۆڵی گرنگ و پۆزەتیفیان لە بوارەكانی پەروەردە و باشكردنی رەوشی مافی مرۆڤ بە گشتی و ژنان بە تایبەتی دەگێڕن، هەر بۆ ئەو مەبەستە سمینار ی كۆڕو كۆبوونەوەشیان بەڕێوەبرد.

 

لە جەژنی نەتەوایەتی و رزگاركردنی كەركوكدا درودوو سڵاو دەنێرم بۆ گیانی بەرزە فڕی شەهیدانی بزوتنەوەی رزگاری خوازی گەلی كوردستان و تەواوی ئازادی خوازانی جیهان، سڵاو بۆ كەس و كاری شەهیدان، لە پێشی پێشەوەی تەواوی چین و توێژەكانیتر ئەوان شایستەی ناوهێنانن ، سڵاو بۆ روحی ئەو مامۆستا ئۆغر خێرانەی كە رێگای ژیانیان بە دەست و پەنجە بڕ لە بڕشتەكانیان بۆ تەخت كردین، سڵاو بۆ ئەو مامۆستا خانەنشیانەی بەهاری تەمەنی خۆیان بەخش بە نەوە لە دوای نەوەی گەلەكەمان، جەزنە بیرۆزەش لەو مامۆستا دڵسۆزانە دەكەم ئێستا لە خزمەت رۆڵە چاوگەشەكان و لاوە رو لە ئاسۆ و داهاتوەكی باشترن، جەزنە بیرۆزە لە ئێوە دەوشێتەوە چونكە ئێوە وێڕای ملاملانێی توند و پڕ لە حەماسەتتان بە تایبەت لە سێ‌ ساڵی رابردوو لەگەڵ دەردەری سەری و كەموكوڕیەكانی ژیان جوانترین دێرەكانی مێژوتان نوسیەوە ، سڵاو بۆ پێشمەرگە قارەمانەكان و شەڕڤانانی دوژمن و داعش بەزێن، سڵاو بۆ هەموو ئەو كوردێكی دڵسۆز لە هەر كوێ بن.

بژی كوردستان بەردەوام بێت بەرخودان 

سەرشۆڕی بۆ دوژمنان و داگیركەران

 

دوای ئەوەی لە دوایین کۆبونەوەی ئەنجومەنی وەزارەتی خوێندنی باڵا و توێژینەوەی زانستی پڕۆژەی بە نێودەوڵەتیکردنی زمان و ئەدەبی کوردی پەسەندکرا، هەنگاوەکانی جێبەجێکردنی ئەو پڕۆژەیە دەستیپێکرد.

لەو چوارچێوەیەدا، ڕۆژی چوارشەممە ڕێکەوتی (15/3/2017) بەسەرپەرشتی د.ئامانج سەعید ڕاوێژکاری وەزیری خوێندنی باڵا و توێژینەوەی زانستی لە دیوانی وەزارەت کۆبونەوەیەک بەڕێوەچو، لەو کۆبونەوەیەدا کە د. جوان جەلال بەڕێوەبەری گشتی فەرمانگەی نێردراوان و پەیوەندییە ڕۆشنبیرییەکان و، ژمارەیەک لە پسپۆڕان و شارەزایانی بوارەکانی زمان و ئەدەبی کوردی ئامادەیبون تاوتوێی لایەنەکانی پڕۆژەکە و چۆنیەتی جێبەجێکردنی کرا.

بۆ ئەوەش لەسەرەتادا دکتۆر ئامانج سەعید کورتەیەکی لەبارەی بیرۆکەی پڕۆژەکە خستەڕو وتی: پڕۆژەی بەنێودەوڵەتیکردنی زمانی و ئەدەبی کوردی یەکێکە لە پڕۆژە گرنگەکانی وەزارەتەکەمان، کە ماوەیەکی زۆرە لە وەزارەت کاری لەسەر دەکەین و، لە دواین کۆبونەوەی ئەنجومەنی وەزارەت-یش پەسندکرا، ئاشکراشیکرد پڕۆژەکە تایبەتە بەدابینکردنی ژمارەیەک کورسی ساڵانەی خوێندن بۆ (بەکالۆریۆس، ماستەر، دکتۆرا و پۆست دکتۆرا) بۆ زمان و ئەدەب و سیاسەت و مێژوو کەلتوری کوردی بۆ خوێندکارانی بیانی، ئەوەشی ڕاگەیاند: ئەم پڕۆژەیە پڕۆژەیەکی نەتەوەیی و نیشتمانیی وەزارەتەکەمانە بۆ دابینکردنی زەمالەی خوێندنی کوردی بۆ خەڵکی بیانی بۆ ئەوەی بتوانن لە زانکۆکانی هەرێمی کوردستان بخوێنن، هەربۆیە وەزارەتەکەمان سەرجەم تێچوی خوێندنی ئەو خوێندکارانە لە زانکۆکانی کوردستان دەگرێتە ئەستۆ، د.ئامانج سەعید جەختی لەسەر ئەوەشکردەوە هاتنی خوێندکار و ستافی نێودەوڵەتی بۆ خوێندنی زمان و ئەدەب و سۆسۆلۆژیای کوردی بۆ زانکۆکانی کوردستان زۆر گرنگە، چونکە دەبێتە فاکتەرێکی گرنگ بۆ بەشداریپێکردنی خوێندکاران و توێژەری بیانی لە پڕۆسەی گەشەپێدانی زیاتری توێژینەوە لە بوارەکانی (کەلتور و کەلەپور، زمان و ئەدەب، مێژو سیاسەت)ی کوردی، ئەوەش بۆ داهاتوی نەتەوەکەمان گرنگی خۆی هەیە، لەبەر ئەوەی ئەو خوێندکارانەی کە دێنە کوردستان و لە زانکۆکانمان هەم لە ڕوی زانستیەوە بەشدارییان دەبێت، هەم لە داهاتودا دەبنە نمایندەی نەتەوەکەمان لەو شوێن و وڵاتەی کە لێوەی هاتون، لەهەمان کاتدا ئەم پڕۆژەیە دەرفەتی توێژینەوە و کاری هاوبەش لە نێوان زانکۆکانی کوردستان و ناوەندە ئەکادیمیەکانی دەرەوەی وڵات دەڕەخسێنی بۆ ئەنجامدانی توێژینەوە و پڕۆژەی هاوبەش لە ڕێگەی ئاڵوگۆڕی خوێندکاران و مامۆستایان.

ڕاوێژکاری وەزیری خوێندنی باڵا و توێژینەوەی زانستی ئەوەشی ڕاگەیاند: تێکەڵبونی کەلتوری نەتەوەکان و ئاڵوگۆڕی زانستی و، ئەنجامدانی توێژینەوە بە گروپی ڕەنگاورەنگ وەک لە ئەزموونی دنیا دەرکەوتوە ئەنجامی باشی هەبوە، بۆیە ئێمەش دەمانەوێت بگەین بەو ئامانجە و بتوانین لەو ڕێگەیەوە خزمەتێکی باشتر بە زمان و ئەدەبی کوردی بکەین و گەشەی زیاتری پێبدەین و دەنگمان بگاتە دنیا.

لەبەشێکی دیکەی کۆبونەوەکەدا ئامادەبوان بەگرنگیەوە لە پڕۆژەکەیان ڕوانی و، بەخەمخۆریەکی گەورە بۆ خزمەتکردن بە زمان و ئەدەبی کوردی لە قەڵەمیاندا، هەروەک بە یەکەم هەنگاوی لەو جۆرە ئەژماریان کرد، کە تا ئێستا بۆ بەنێودەوڵەتی کردنی زمان و ئەدەبی کوردی نرابێت.

هەر لەو کۆبونەوەیەدا گفتوگۆ لەبارەی ناوی پرۆژەکە و ژمارەی کورسیەکان بۆ خوێندنی (بەکالۆریۆس، ماستەر، دکتۆرا و پۆست دکتۆرا) کرا، هەروەک دەستنیشانکردنی میکانزم و ڕێکارەکانی چۆنیەتی گەیاندنی ئەو زەمالەیە بە خوێندکاران و ئارەزومەندان لە سەرانسەری دنیا قسەی لەبارەوە کراو کۆمەڵێک پێشنیاز گەڵاڵەکران.

لە کۆتایشدا کۆبونەوەکە، گەیشتە چەند بڕیارێکی گرنگ لەبارەی میکانزم و هەنگاوەکانی جێبەجێکردنی ئەم پڕۆژەیە، لە هەمانکاتدا کۆبونەوەکە بڕیاری ئەوەشیدا پڕۆژەکە لە ساڵی خوێندنی (2017-2018) دەچێتە بواری جێبەجێکردنەوە.

http://mhe-krg.org/ku/node/3491

مەكتەبی سكرتاریەتی یەكێتی مامۆستایانی كوردستان كۆبوونەوەی ئاسایی خۆی ژمارە (84) لە رێككەوتی (18/3/2017) لە پارێزگای كەركوك بەڕێوەبرد، لەكۆبوونەوەكەدا گفتو گۆ لەسەر كۆمەڵێك بابەتی پەروەردەیی و رێكخراوەیی كرا،لەوانە : 

دەرماڵەی هاندان و بەردەوامیدان پێی . 

چۆنیەتی رێكخستنەوەی پرۆسەی سەرپەرشتیاری . 

كۆلێژی پەروەردەی كراوە و دوا هەوڵ بۆپەسندكردنی بڕوانامەكانی دەرچوانی خولەكانی (8-9) . 

كۆنگرەی ئاوارەكان و رەوشی پەروەردە لە هەرێمی كوردستان كە پێشنیار كراو یەكێـتی مامۆستایانی جیهان (EI) بەڕێوەی ببات . 

بڕیاری وەزارەتی خوێ،دنی باڵا و توێژینەوەی زانستی لەسەر سەرپشكردنی قوتابیان و خوێندكاران لە هەژماركردنی نمرەی هەردوو زمانی كوردی و عەرەبی لە وەرگرتن لە كۆلێژەكان پزیشكی و ئەندازیاری و زانستی ، لەمبارەیەوە بە باشزانرا پڕۆژەیەك ئامادە بكرێت وەكو چارەسەر بۆ ئەو كاردانەوانەی بۆ ئەو بڕیارە دروست بووە هەروەها كۆبوونەوەیەكی تایبەتیش لەگەڵ وەزارەتی ئاماژەپێكراو لەسەرەوە . 

داواكاری پارێزگاری كەركوك بۆ بەرزكردنەوەی ئاڵای كوردستان لەسەر دامودەزگاكانی حكومەت لەو پارێزگایە ، لەمبارەیەوە بڕیاردرا نامەیەكی پشتیوانی بۆ ئەو مەبەستە ئاراستەی بەڕێز پارێزگار بكرێت . 

وێڕایی ئەم بابەتانە كۆمەڵێك بواری رێكخراوەییش قسە و باسیان لەبارەیەوە كرا، بڕیاری پێویستیشیان لەبارەیەوە درا . 

كۆبوونەوەكەش سێ كاتژمێری خایاند 

بە داخ و پەژارەیەكی زۆرەوە هەواڵی كۆچی دوایی پێشمەرگەی دێرین و هاوسەری بەڕێزتمان خوالێخۆشبوو شوعلە خانمان پێگەیشت ، هاوبەشی خەمتانین، لە پەروەردگار دەپاڕێینەوە روحی پاكیان لە بەهەشتی ئەبەدی خۆی ئۆقرە پێبگرێ‌ و سەبوری و دڵنەواییش بە ئێوەمانان و كەس و كاری ببەخشێ‌ و ئەم كۆستەش دوا كۆستی هەموو لایەكتان بێت .
یەكێتی مامۆستایانی كوردستان
مەكتەبی سكرتاریەت
18 ی ئاداری 2017

 

بە بۆنەی رۆژی (8) ئادار كە دەكاتە رۆژی جیهانی ژنان، لقی هەولێری (ی.م.ك) چەندین ناوەندی خوێندنیان بەسەر كردەوە كە زۆربە دەستەی مامۆستایانیان لە رەگەزی مێینەن هەر بۆ ئەو مەبەستە لقی خانەقینی (ی.م)كۆمەڵێك چالاكی ئەنجامدا لەوانە دارچاندن، سمینار لەسەر مافی ژنان و چەندین ناوەندی خوێندنیان بەسەركردەوە هەروەها كەرتی كفری (ی.م) پیشانگەیەكی وێنەیی بۆ (55) ژنی هونەرمەند و دەست رەنگینی كردەوە، تیایدا كۆمەڵێك تابلۆی زۆر جوان خرایە رو، هەر بۆ ئەو مەبەستە لقی هەڵەبجەی شەهیدی یەكێتی مامۆستایانی كوردستان رێورەسمی رێزلێنانی بۆ ژمارەیەك بەڕێوەبەری ناوەندەكانی خوێندن و سەرپەرشتیاران و ژیانی بەرپرسی لە دامو دەزگاكانی بەڕێوەبرد، لەو رێو رەسمە وێڕای پێشكەشكردنی قەڵغانی (ی.م) بەو ژنانەی ئاماژەیان پێدراوە، هەوڵەكان (ی.م) شیان رونكردەوە لە ژێر رۆشنایی پرنسیبە نێودەوڵەتیەكان و بەرنامەی یەكێتی مامۆستایانی جیهان(EI) لەمەڕ پشتیوانیكردن لە بەدەست هێنانی مافەكان بە دیاریكراوی رەخساندنی هەلی یەكسان بۆ خوێندن بەبێ جیاوازی لەگەڵ رەگەزی نێرینە بۆ هەموو قۆناغەكان و بە بەردەوام و لەگەڵ تەمەن، پێویستە بوترێ ئەو رێورەسمە بووە مایەی رێز و پێزانین لە لایەن ئەو ژنانەوە .

 

شه‌وی رابردوو، محه‌ممه‌د مه‌لا كه‌ریم ئه‌دیب و نووسه‌ری ناسراوی كورد، به‌ هۆی نه‌خۆشییه‌وه‌ كۆچی دوایی كرد.

محه‌مه‌دی مه‌لا كه‌ریم، كوڕی زانای ناسراو و رووناكبیری كورد عه‌بدولكه‌ریم موده‌ڕیس بوو، یه‌كێك بوو له‌و نووسه‌رانه‌ی، ساڵانێكی زۆر له‌ نێو ئه‌ده‌ب و زمانی كوردیدا قاڵ بووبووه‌وه‌، به‌ یه‌كێك له‌ كلاسیكناسه‌ ده‌گمه‌نه‌كانی كورد داده‌نرا.

محه‌مه‌دی مه‌لا كه‌ریم، هه‌ر له‌سه‌ر ئاستی عێراقیش كه‌سایه‌تی و ئه‌دیبێكی ناسراو بووه‌، به‌و پێیه‌ی به‌رهه‌مه‌كانی له‌ ئاستێكی باڵادا بوو، به‌ هۆی ئه‌وه‌ی ساڵانێكی زۆر له‌ به‌غدا ژیاوه‌.

پرسه‌و سه‌ره‌خۆشی خۆمان ئاراسته‌ی به‌ڕێز مامۆستا ئه‌حمه‌د گه‌رمیانی (جێگیری سه‌رۆكی یه‌كێتی مامۆستایانی كوردستان" ده‌كه‌ین، به‌ بۆنه‌ی كۆچی دوایی دایكی به‌ڕێزتان، داواكارین له‌ یه‌زدانی مه‌زن ره‌حمه‌تی به‌ به‌شتی به‌رین شاد بكات و سێبوری و دڵنه‌وایی به‌ خانه‌واده‌كه‌شتان بدات.

 

انا لله وانا اليه راجعون 

یه‌كێتیی مامۆستایانی كوردستان

مه‌كته‌بی سكرتاریه‌ت

11/3/2017


                                                                            ن: عەبدولواحێد محەمەد
           ماوەیەكە مامۆستایان بوونەتە سەردێری باس و خواس و هەواڵەكان، هەریەكە و بە شێوەیەك لە شێوەكان بێ ئەوەی لێكدانەوە بۆ بۆچون و دۆخەكە بكات، توانج لە مامۆستایان دەگرن بە تایبەت هەندێك راگەیاندن وەك ئەوەی هەنگوینیان لە كونی دارا  دۆزیبێتەوە، هەر كە گوێبیستی وشەی مامۆستا دەبن ئیتر كوێ قوڵاغ دەبن دەكەونە سەروسۆراغ كردن وەك ئەوەی كێشەی ئابوری و سیاسی ئەم گەلە بەش مەینەتە بێت، هەژماریش بۆ ئەوە ناكەن ئەو وتەو توانجانە لەسەر كەسانێك دەیكەن لە پەیدابوونی شارستانیەتەوە لە كایەی سیاسی و ئیداریدا هەمیشە رابەر و لە كایەی پەروەردەییشدا شۆرە سواری بێ ركابەر و لە بواری كۆمەڵایەتیشدا هەمیشە پێشەنگ و داهێنەری بنەما بونیادیەكانی كۆمەڵگەی تەندروست بوونە، بۆیە مامۆستایان هەمیشە سەربەرزو ریزلێگیراو لەلایەن كۆمەڵانی خەڵكەوە بوون، لە مێژووی سەد ساڵی رابردووی كوردستانی خۆشمان جێ پەنجەی ئەو كەڵە پیاوانە لە هەموو مەیدانەكان رەنگڕێژو نەقشدار بووە، لە خەباتی نەتەوەیی و نیشتمانیشدا سەر سەكۆی سێدارە و كونجی بەندیخانەكان گەواهی راستی و سەرسەختی ئەو توێژەی ساغ كردۆتەوە، كەسێك نەبووە ئەو فەرهەنگە پڕ لە حەماسەتە ئاوەژو بكاتەوە، لێ بەداخەوە ماوەیەكە هەر وەك لە پێشەوە ئاماژەمان پێدا مامۆستا بۆتە ئامانج و بە بەرنامە كار بۆ تەڵخ كردنیان دەكرێت، من ترسم لەوە هەیە ئەو تەنزە قێزەون و ناشیرینەی داگیركەران بۆ سوكایەتیكردن كە هەمیشە ویستویانە بە باڵای پرۆسەی پەروەردە و فێركردنەوە بیدرون، بە بێ ئاگا ئێستا دووبارە بكرێتەوە، دەنا چ پێویستە لە پرۆسەیەكی وا گەورەو گرنگدا، رووداو و هەندێ ئەدگاری تایبەت لە قەبارەی خۆی گەورەتر بكرێت، هەندێك راگەیاندنیش وەك كێبڕكێی رۆژنامەگەری بیكەنە سەردێری هەواڵ و راپۆرتەكانیان، تەنها ئەو لایەنەش پیشان بدەن كە مەبەستیان لێی ناشیرینكردنی مامۆستا و پەروەردەیە، بە داخەوە لەو ماوەیەدا دوو سێ روداو لە نێو ناوەندەكانی خوێندن و مامۆستایاندا ئەوەندە گەورەكرا وەك ئەوەی سەرلەبەری پرۆسەكە لە ژێر پرسیار دابێت،هەموشی لەوە چڕكراوەتەوە مامۆستا گوناهی كردووە دەبێت حساب وكتابی لەگەڵدا بكرێت، لە كاتێكدا لە هەمان ئەو ماوەیە و لە رابردووشدا چەند كاروكردەوەی زۆر خراپ دەرهەق بە مامۆستایان كراوە كەسیش باسی لێوە نەكردووە، بەڕاستی ئەوە مایەی نیگەرانیە كە دەبوو  لە ساتەوەختی خۆیدا بە بەرنامە كاری بۆ بكرابا، جێی باسە ئەو جۆرە بانگەشە و روماڵكردنە بۆ خەڵكانێكی فورسەت تەلەب و نادیدەگری هەوڵ و كۆششەكانی مامۆستایان بۆتە بزنس و سەركێشان بۆ سەوداو مامەڵەكردن لەسەر بڕێك پارە، بە بیانوی ئەوەی زیانی جەستەیی لێكەوتۆتەوە ، یان كاریگەری دەرونی دروست كردووە، راستە بەكارهێنانی توندوتیژی قەدەغەیە و نابێت  لە ژێر هەر بڕوبیانوكەوە بەكار بهێنرێت، جێی وەبیرهێنانەوەیە ئەو بنەمایەی  پرۆسەی پەروەردە ئەگەر بۆ مامۆستا هێلی سور بێت بۆ هەموو لایەنەكانی نێو پرۆسەكە هەر بەمشێوەیە، سەرەنجام یاسا هەر یاسایە ئەگەر بۆ مامۆستایان كارپێكراو بێت بۆ قوتابیان و خوێندكاران و دایكان و باوكانیش دەبێت بە هەمان شێوە پیادە بكرێت،جێگای هەڵوێستەكردنە یاسا كارپێكراوەكان زیاتر دەرهەق بە مامۆستایان بەكارهێنراوە، لەوەیاندا نیگەرانیەكی زۆری دروستكردووە بۆیە ئێستا كۆمەڵێك چەمكیشی لەگەڵ خۆیدا هێناوە وەك ( مامۆستا شكۆی نەماوە) ، ((پێویستە شكۆ بۆ مامۆستا بگەڕێتەوە)) هەر چەندە من لەگەڵ دەقا و دەقی ئەو دەستەواژانە نیم بەڵام بێگومان ئەم بارودۆخە و ئەو جۆرە روداوانە كە هیواخوازم نەگاتە دیاردە، گرفتی دەرونی و كۆمەڵێك پرسیاری دروستكردووە، دەبێت هەموو لایەنەكان كار بۆ سنورداركردنی بكەن لەوانە : -
1-    وەزارەتی پەروەردە : هەموو دامودەزگاكان كە دەزگای سەرەكی و بەرپرسی یەكەمن لە بەڕێوەبردنی پرۆسەكە و راستەڕێكردنی تەواوی جومگەكانی،  بە تەواوی  بە ئەركەكانی خۆیان هەڵنەستاون ئەوەندەی فۆكسیان لەسەر مامۆستایان بووە  نیو ئەوەندە لەسەر لایەنەكانیتر نەبووە، ئەوەی بەردەوام وتراوە و بەدواداچونی بۆ كراوە  تەنها و تەنها هەر قەدەغەكردنی لێدان بووە، هۆكار و بەرەنجام و لێكەوتەكانی رون نەكراوەتەوە كە بۆچی ئەو بڕیارە دەركراوە، بەرامبەرەكان دەبێ چۆن و چی بكەن؟.
2-    راگەیاندنەكان: بەڕاستی راگەیاندنەكان ئەوەی لەسەریان پێویستە نەیانكردووە زۆرترین جار بەلای وروژاندنی خەڵكەوە بوون یان هەندێك جاران بۆئەوەبووە دیوی ناشرینی كەسایەتیەكان یان دەزگایەك نیشان بدەن لەكاتێكدا راگەیاندن زۆر ئەركدارترە، واتە دەبێت بۆ هەر روداوێك بەدواداچون بۆ تەواوی كێشەكە  بكات، واتە هۆكاری سەرهەڵدان ، ژینگەی خێزان پاشخانی مەعریفی و دەرونی و  توانای بێداغۆچی مامۆستا، لێپرسراوەتی بەڕێوەبەر و سەرپەرشتیار و دامودەزگا لۆكالیەكانی پەروەردە .
3-    یەكێتی مامۆستایان: ئەو رێكخراوە  بەشێوەیەكی رێكوپێك نەپڕژاوەتە سەر ئەو شێوە مامەڵەكردنە، لەكاتێكدا زۆر گرنگە توێژینەوە لەسەر ئەو روداوانە بكات و تەواوی پاشخان و هۆكارەكانی دیاری بكات، جێگای باسە دامودەزگاكانی وەزارەتی پەروەردە كار ئاسانیان بۆ ئەو رێكخراوە نەكردووە بەتایبەت لە مەسەلەی لێكۆڵینەوە و بەدواداچونەكان، ماوەی دوو ساڵە لە ژێر هەندێك بیانوەوە ئەو بوارەیان نەڕەخساندووە، لەگەڵ ئەوەشدا (ی.م) نابێت لەسەر ئەوە رابوەستێت بەڵكو دەبێت بەردەوام بن چونكە ئەوە بوارێكی كاری رێكخراوەیی گرنگەو یاساش بۆی ئەو بوارەی بۆ هەڵخستوە، ئێستاش بۆ ئەوەی ئەو روداوانە نەبنە دیاردە و شێوە بزنسێك بۆ خەڵكانێكی دیاریكراو نەداتە دەست، دەبێت هەموو لایەنە پەیوەندیدارەكان ئۆرگانی تایبەت پێك بهێنن بۆ دراسەتكردنی هۆكار و بەرەنجام و لێكەوتەكان هەروەها چارەسەرەكانیش، بۆ ئەوەی چیتر نەبێتە سەردێری باس و خواسەكان و بنیشتە خۆشەی سەرزاران .   



          لە دوازدەمین كۆنگرەی یەكێتی مامۆستایانی كوردستاندا، بەرنامەیەكی كار بە زۆرینەی دەنگی ئەندامانی كۆنگرە پەسندكرا، لە بنەڕەتدا بەرنامەی كارەكە لەلایەن چواردە لێژنەوە ئامادە كرابوو كە سەرجەم بوارەكانی كاركردنی رێكخراوەیی لەخۆ دەگرت، بۆ ئەوەی لەماوەی كاركردنی نێوان دوو كۆنگرە ئۆرگانە سەرەكی و لاوەكیەكانی (ی.م) كاری لەسەر بكەن، دیارە لەو ماوەیەدا واتە لەسەرەتای (2012)ەوە یەكێتی مامۆستایان تەواوی تواناكانی خستەگەڕ تاوەكو بەشی زۆری بەرنامەی پەسەندكراو بخاتە بواری جێبەجێكردنەوە بەتایبەت بۆ ئەم جومگانە : -
1-    باشتركردنی ژیان و گوزەرانی مامۆستا .
2-    پێداچونەوە بە پرۆسەی پەروەردە هەروەها خوێندنی باڵا بەجۆرێك لەگەڵ پێداویستیەكان بگونجێت .
3-    بایەخدان بە خوێندنی گشتی تاوەكو رێ لە بڵاوبوونەوەی زیاتری خوێندنی تایبەت بگیرێت.
4-    بایەخدان بە راهێنان و باشتركردنی ئەدای مامۆستایان .
5-    بایەخدان بە توێژینەوە و لێكۆڵینەوەی زانستی ، هەروەهادامەزراندنی سەنتەری تایبەت بۆ ئەو مەبەستە .
6-    برەودان بە پەیوەندیەكانی ناوەخۆ و دەرەكی .
7-    رەخساندنی هەلی زیاتر بۆ كادیری ژن لە ئۆرگانەكان و كۆمەڵێك بوار و بابەتی تر.                     
         ئەمەو بێجگە لەو پرس و ئەگەرانەی زەمەن و رۆژ لەگەڵ خۆیان دەیانهێننە پێشەوە، لەكاتێكدا یەكێـتی مامۆستایان پێشبڕكێی لەگەڵ زەمەن دەكرد تاوەكو زۆرترینی بەرنامەكەی بەرجەستە بكات بێگومان بەهەوڵی هەموو ئۆرگانەكان هەر لە ئەنجومەنی تەنفیزیەوە تا دەگاتە سكرتاریەت و ئەنجومەنی لقەكان و كەرتەكان و نوێنەرایەتیەكان، جێگای داخە لەسەرەتای (2014)ەوە بەهۆی سەرهەڵدانی قەیرانی دارایی و دواكەوتنی موچە بەشێكی باش لە تواناكان بۆ چارەسەركردنی ئەو پێشهاتە لە ناكاو و گرنگە چڕ كرایەوە، لە پڕ و لە ناوەڕاستی (2014) هێرشی تیرۆرستانی داعشی هاتە سەر، بەشێوەیەك هەمووی سەرەو گێڕكردەوە تا ئەو سنورەی دەستی هەموو تاكەكان لەسەر دڵیان بێت ئاخۆ ئەو پێشهاتە نەخوازراوە چ لەگەڵ خۆی دەهێنی، هاوكاتی ئەو پەلامارە نا مرۆڤانەی تیرۆرستان هاتنی بەلێشاوی ئاوارەشی هاتە سەر كە دەكرێ بڵێین هەموو ئەوراق و بەرنامەكانی پێچەوانە كردەوە ، ئیتر خەمی گەورە بۆ ئارامی و ئاسایش و روبەڕوبوونەوەی تیرۆرستان و هاوكاری كردنی هێزی پێشمەرگە و ئاوارە و پێداویستیە هەنوكەییەكان تەرخانكرا، سەرباری ئەو هەموو پێشهات و روداوانە یەكێتی مامۆستایان بەردەوام بوو لە كارەكانی بەرامبەر بەو دۆخە تازەیەش بە بڕیاری ئەنجومەنی تەنفیزی پرسە نیشتمانی و نەتەوایەتیەكانی كردە ئەولەویەتی كاركردن هاوزەمان برەودان بە ئەركە رێكخراوەییەكانیش،وەك ریسای كاری رێكخراوەییش بەگرنگی دەزانین كۆی كاروچالاكیەكانی (2015-2016) لە جومگە و بوارە سەرەكیەكان وەك ئیش و كاری ئۆرگانەكان بەگشتی، پەیوەندیەكان، پەرەپێدانی توانای مرۆیی، دارایی و دەستەبەری، هەروەها هەڵوێستیش لەسەر روداو و پێشهاتەكان بخەینەڕو دواجاریش هەڵسەنگاندنی بۆ بكرێت تاوەكو لە كام جومگە خەوش هەبێت، هەڵوەستەی لەسەر بكرێت : -
1-    كاروباری ئۆرگانە سەرەكیەكان ( تەنفیزی،سكرتاریەت،لقەكان) لەماوەی ئەو دوو ساڵەدا هەریەك لە ئەنجومەنی تەنفیزی و مەكتەبی سكرتاریەت بە پێی یاسای ژمارە(1)ی ساڵی (2012)هەمواركراوی یاسای  ژمارە (4)ی ساڵی (2002)یەكێتی مامۆستایانی كوردستان هەروەها پەیڕەو و پرۆگرام، كار و بارەكانی خۆیان ئەنجامداوە بەشێوەیەك: -
أ‌-    ئەنجومەنی تەنفیزی هەر سێ مانگ جارێك كۆبوونەوەكانی ئەنجامداوە كە كۆی دەكاتە (8) كۆبوونەوەی ئاسایی و (1) كۆبوونەوەی نائاسایی، لەهەموو كۆبوونەوەكان سەرۆكی هەر دوازدە لق و لێژنەكانی مەكتەبی سكرتاریەت راپۆرتەكانیان خستۆتە ڕو و گفتوگۆی چڕ و پڕیان لەسەر كراوەو وەڵامی پێویستیشیان دراوەتەوە .
ب‌-    مەكتەبی سكرتاریەت  هەر بەپێی یاسا و پەیرەو و پرۆگرام مانگانە كۆبوونەوەی ئاسایی ئەنجامداوە  وێرای ئەوەی لەكاتی پێویستیش كۆبوونەوەی نائاسایی ئەنجامداوە بەشێوەیەك لەو دوو ساڵە (28) كۆبوونەوەی ئەنجامداوە، لە هەموو كۆبوونەوەكان گفتوگۆی چڕ و پڕ لەسەر بڕگە و بابەتەكان و جێبەجێكردنی بڕیار و راسپاردەكانی ئەنجومەنی تەنفیزی كراوە .
ج- لێژنەكانی مەكتەبی سكرتاریەت  بەپێی پێویست كاروئەركەكانی خۆیان بە ئەنجام گەیاندووە وەك لێژنەكانی كارگێڕی ، دارایی، دەستەبەری، پەروەردە و بەدواداچون، پەیوەندیەكان، راگەیاندن، هاوكات لێژنە لاوەكیەكانیش كە بۆ راپەڕاندنی هەندێ كاروباری تایبەت پێكهێنرابوون لەوانە هەڵبژاردن ، ناسنامە، پڕۆژەكان، ئەمەش كورتەی كاروچالاكی لێژنەمانە :-
لێژنەی كارگێڕی : رۆژانە كاروبارەكانیان جێبەجێكردووە لەو دوو ساڵە (510) نوسراوی جۆراوجۆریان كردووە لەگەڵ (61) فەرمانی كارگێڕی و (8) رێنمایی گشتیشیان ئاراستەی لقەكان و لایەنەكان كردووە.
لێژنەی ناسنامە: (72)هەزار ناسنامەیان كردووە كە ئەوە خۆی لەخۆیدا ئەنجامدانی كارێكی باشە.
-    لێژنەی پڕۆژەكان كۆمەڵێك كاری ئەنجام داوە لەوانە بەدواداچون بۆ پڕۆژەكانی شاری مامۆستایان لەهەولێر، سلێمانی، دهۆك، هەروەها كاركردن لەسەر كۆمەڵێك پڕۆژەیتر كە دەسكەوتێكی زۆرباش دەبوو ئەگەر هاتنە پێشی ئەم بارودۆخە نەخوازراوە نەبوایە.
-    لێژنەی راگەیاندن كاری خۆیان بەڕێوەبردووە لەوانە درێژەدان بە پەیجی (ی.م.ك) لە (2014)و دە ژمارە گۆڤاری مامۆستایانی دەركردووە ئەگەر سەختی باری دارایی نەبووایە بێگومان تا هەنوكە درێژەیان پێدەدا، ئومێد وایە لە ئایندە بتوانن سەر لەنوێ درێژەی پێ بدەین، لەهەمان كاتیشدا بەردەمیشیان بەپوختە كردنی هەواڵ و راگەیاندنە جۆراوجۆرەكان داوە هاوكاری دەیان مامۆستاش كراوە بۆ لە چاپدانی بەرهەمەكانیان.
-    لێژنەی پەروەردە و بەدواداچون هاوكات لەگەڵ لێژنەكانی لقەكان، بەشداری بەدواداچونیان بۆ دەیان و سەدان كێشەی پەروەردەیی و مامۆستایان كردووە بەهاوكاری مەكتەبی سكرتاریەتیش كاریان بۆ چارەسەركردنی ئەو لێك تێنەگەیشتنە لەگەڵ بەشی یاسای وەزارەت و ئەنجومەنی دادوەری كردووە لەمەڕ لێژنەكانی لێكۆڵینەوە لەسەر ئاستی بەڕێوەبەرایەتی گشتی و بەڕێوەبەرایەتی پەروەردەكان هاوشێوەی لێژنەكانیتر.
-    لێژنەی دارایی و دەستەبەریش كاروبارەكانی خۆیان بەچاكی بەڕێوەبردووە هەماهەنگی باشیان لەگەڵ لێژنەكانی لقەكان هەبووە بۆ ئەوەی هەردوو بواری دارایی و دەستەبەری بەپێی ئیمكانیات و هەلومەرجەكە بەڕێوەببەن، بەرێژەیەكی باش سەركەوتوبوون، لە بەشێكی ئەم راپۆرتە بە وردی تیشك دەخەینە سەر وردەكاری ئیشكردنیان .
2-    پەیوەندیەكان: لەم بەشە تیشك دەخەینە سەر كۆی پەیوەندیەكان نەك تەنها لێژنەی تایبەت، لەبەر ئەوەی یەكێك لەكارە هەرە گرنگەكانی رێكخراو دروستكردنی پەیوەندیەكی زیندوو و بەردەوامە لەگەڵ زۆربەی ئەو ناوەندانەی بۆ بەرجەستەكردنی داخوازیەكان پێویستت پێیان هەیە، ئەم بوارە ئەگەر بۆ هەر رێكخراوێكی پیشەیی یان جەماوەری زەرور بێت بەدڵنیاییەوە بۆ (ی.م.ك) زۆر زەروریترە بەو هەژمارە ئیش و كاری ئەم رێكخراوە پەیوەستە بەپرۆسەی پەروەردە و خوێندنی باڵا، پەروەردەش ئەگەر لە هەر وڵاتێك سیما و خەسڵەتی جیاوازی هەبێت، بەڵام دواجار هەموی خزمەت بەمرۆڤایەتی دەكات، دەكرێت لە زۆربەی جومگەكانی ئەو پرۆسەیە لێرەو لەوێ سود لەیەكتر وەربگرن، دیارە پەیوەندیەكانیش دەكرێتە دوو بەش بەشی ناوەخۆ و بەشی دەرەكی: -
أ‌-    ناوەخۆ : هەروەك لە پێشدا ئاماژەمان پێدا كە بنیاتی پەیوەندیەكی تەندروست دەبێ لە پێشینە كارەكانی بێت، چونكە لە هەر پرس و ئەگەرێك ئەكید دەبێت كەناڵی پەیوەندیكردن بەكاربێت، چونكە هەر كاتێك تۆ داواكاریەكت هەبێت دەبێ پێشكەش بەلایەنی پەیوەندار بكرێت مەرج نیە بۆ هەر داواكاریەك تۆ پەنا بۆ هەموو ئەو ئەوراقانە ببەیت كە لە یاسادا بۆت فەراهەم كراوە، رەنگە هەندێك لەو داواكاریانە بەدایەلۆگێگی نەرم كە سەرەتاكانی پەیوەندیكردنە ئامانجەكەت بەدەست بێت، زۆر زەروریە رێكخراوەكان یەكەم هەنگاوی كاری رێكخراوەییان شارەزایی لە چۆنیەتی بەڕێوەبردنی گفتوگۆ بێت، یەكێـتی مامۆستایانی كوردستان خۆشبەختانە تا سنورێك مەبدەئی گفتوگۆ و پەیوەندیەكی نۆرمەڵی لەگەڵ ناوەندە بڕیار بەدەستەكانی دروست كردوو، ئەگەر چی هەندێ جار لە هەردوولا لادان هەبووە لەو مەبدەئە بەڵام بەتێكڕا لایەنە ئەرێنیەكەی باشتر بوو لە نەرێنیەكەی تارادەیەكی باشیش توانراوە ئەو پەیامەی دروستەی كە رەنگدانەوەی داخوازیەكانی مامۆستایانە بگەیەنرێتە هەموو لایەنەكان، دەكرێ ئەوەش بوترێت بەشێكیش لێی جێبەجێ كراوە لەمبارەیەوە پێویستە ئەو بنەمایانەی پێویستە بۆ پەیوەندی و دایەلۆگ ئاماژەی پێبدرێ بەتایبەت لەكاتێكدا بتەوێت دەسكەوتێك بەدەست بێنی كە بریتین لە:
1-    زۆر پێویستە بەر لەوەی هەر داخوازیەك پێشكەش بكەیت دراسەتی وردی بكەیت تا چەندی لەگەڵ یاسا و رێساكان دەگونجێت .
2-    ئەگەر ئیمكانیاتی ماددی دەوێت ئایا لایەنی پەیوەندیدار ئەو توانا داراییەی هەیە .  
3-    لەگەیاندنی پەیامەكە دەبێت هەنگاو هەنگاو بچیتە پێشەوە.
4-    زۆر پێویستە بەر لەوەی داواكاریەكە پێشكەش بكەیت هەوڵی ئەوە بدەیت بەرپرسی نەرم بدۆزیتەوە تا ببێتە هاوكارت لە بەجێهێنانی داواكاریەكەت ئینجا ئەوانیتر.
5-    دەبێت هەوڵی دروستكردنی لۆبی لەناو لایەنە پەیوەندیدارەكان دروست بكەیت تا هاوكاری بن لە بەرجەستەكردنی داخوازیەكان .
6-    نابێت هەموو رێكارە مەدەنیەكان بەكاربهێنری لەهەر داواكاریەك بتەوێت بیكەیت.
 7- زۆر گرنگە شارەزایەكی تەواوت لە گفتوگۆ و بنەماكانی هەبێت، چونكە چەند بەهێزبیت ئەگەر ئەو شارەزایەت نەبێت رەنگە لایەنی پەیوەندار بە پێچدانەوەیەكی یاسایی دواجار جێبەجێكردنی داواكاریەكەت بەتاڵ بكاتەوە، لەبارەی پەیوەندیە ناوەخۆییەكان و ئەو چالاكیانەی لەو ماوەیە ئەنجامدراوە، بەكورتی ئاماژەیان پێ دەدەین: -
1-    پەیوەندی كردن بەلایەنە سیاسیەكان بەتایبەت ئەو لایەنانەی بەشداری حكومەتی هەرێمن هەروەها ئەوانەی كاریگەریان لەسەر گۆڕەپانی سیاسی كوردستان هەیە، بۆ ئەو مەبەستە سەردان و كۆبوونەوە لەگەڵ مەكتەبی سیاسی پارتی و یەكێتی و بزوتنەوەی گۆڕان و بەرێز ئەمینداری یەكگرتو و ئەمیری كۆمەڵی ئیسلامی و سكرتێری حزبی شوعی  دەستەی سەركردایەتی حیزبی زەحمەتكێشانی كوردستان و لایەنە توركمانیەكان كراوە، پەیامی راست و رەوانی (ی.م)یان پێڕاگەیاندراوە كە دەبێت كار بۆ یەكریزی نیشتمانی بكرێت تەئكیدیش لەسەر ئەوە كراوەتەوە ئەوەندەی كۆمەڵانی خەڵك نیگەرانن لەدۆخە سیاسیەكە ئەوەندە نیگەران نین لە دۆخە داراییەكە چونكە پێیان وایە دۆخی نالەباری سیاسی هۆكاری سەرەكیە بۆ ئەم دۆخە داراییە ناهەموارە .
2-    كۆبوونەوە لەگەڵ سەرۆكایەتی هەرێم و پێشكەشكردنی داواكاری مامۆستایان لەمەڕ باشكردنی رەوشی ژیان و گوزەرانی مامۆستایان و هەروەها هۆكارەكانی باشتركردنی بەڕێوەچونی پرۆسەی پەروەردە و خوێندنی باڵا كراوە.
3-    ئەنجامدانی شەش كۆبوونەوە لەگەڵ سەرۆكایەتی ئەنجومەنی وەزیران لەماوەی ئەو دوو ساڵە تێكڕای كۆبوونەوەكان بۆ ئەوەبووە لەلایەك باشكردنی ژیان و گوزەرانی مامۆستایان بەتایبەتی دوای پیادە كردنی سیستەمی پاشەكەوتی نایاسایی، لەلایەكیتر بۆ دابینكردنی پێداویستیەكانی پرۆسەی پەروەردە و خوێندنی باڵا لەبەر ئەوەی ئێستا هەوڵە جیهانیەكان لەپێناوی ئەوەیە رەوشی پەروەردە لەسەر هەموو ئاستەكان باشتر بكرێت، دروشمی سەرەكیش (good teaching for all) فێربوونی باشە بۆ هەموان.
4-    كۆبوونەوەی دەوری و مانگانە لەگەڵ هەریەك لە بەڕێزان وەزیری پەروەردە و وەزیری خوێندنی باڵا كراوە،لەكۆی كۆبوونەوەكان جەخت كراوەتەوە لەسەر ئەوەی پەروەردە و خوێندنی باڵا دەبێت ئیمكانیاتی دارایی و مەعنەوی تەواویان بۆ فەراهەم بكرێت تاوەكو وەڵامی داخوازیەكانی ئەم قۆناغە بدرێتەوە لەلایەكیتر بەردەوام پڕۆژە و پێشنیاری گونجاو و زانستیانە خراوەتە بەردەستی هەردوو وەزارەت لەمەڕ كۆمەڵێك بابەتی گرنگ لەوانە :-
1-    باشتركردنی ئەدای مامۆستایان ئەوەش بەكردنەوەی خولی راهێنانی بەردەوام گەورەترین كێشە لەجیهان كەمی مامۆستای لێوەشاوەیە بێگومان لەهەرێمی كوردستانیش ئەو حاڵەتە هەیە، ئامارەكان ئەوەیان ئاشكرا كردووە جیهان پێویستی بە (5.5)پێنج ملیۆن و نیو مامۆستای باش هەیە لەو ژمارەیە بەشە زۆرەكەی لە ئاسیا و ئەفەریقایە.
2-    گۆڕانكاری بەردەوام لە پڕۆگرامەكان بەشێوەیەك لەگەڵ پێشكەوتنە زانستیەكان گونجاو بێت .
3-    هەوڵدان بۆ لە بازاڕكردنی خوێندن واتە لەرێگای پەروەردە و فێركردنەوە پێویستیەكانی بازاڕ لەكادیری پیشەیی و لێهاتو دابین بكرێت  .
4-    بایەخدان بەتوێژینەوە و لێكۆڵینەوە كە ئەو دوو پرەنسیپە بنەمای گۆڕانكاریە زانستیەكانە لەبوارە جۆراوجۆرەكان .
5-    گرنگیدان بەتەكنەلۆژیای تازە لە پرۆسەی پەروەردە و  فێركردن كە پاڵنەرێكی گرنگە بۆ پێگەیاندنی توێژێكی كارا لەنێو, كۆمەڵگە.
6-    بایەخی تەواو بە پەیوەندیەكی تەندروست لەنێو كارەكتەرە سەرەكیەكانی پرۆسەی پەروەردە بدرێت كە دەبێتە هۆكاری باشی بەڕێوەچونی پرۆسەكە .
لەم دوو ساڵەدا زیاتر لە (30) بەیاننامە و راگەیاندراو و پڕۆژە و یاداشت دەركراوە لەسەر ئەم بوار و بابەتانە: -
1-    بەیاننامەكانی تایبەت بووە بە ساڵیادی دامەراندنی یەكێتی مامۆستایان و جەژنی مامۆستا و ساڵی تازەی خوێندنەوە لەكۆی ئەو بەیاننامانە تەئكید لەسەر رۆڵی یەكێـتی مامۆستایان لە دەسپێكی دامەزراندنیەوە لەمەڕ مەسەلە نیشتمانی و نەتەوەییەكان و پرۆسەی پەروەردە و فێركردن و هەڵوێستی دڵسۆزانە و خۆنەویستانەی مامۆستایان لە وێستگە بەوێستگەی گەلی كوردستان كراوەتەوە كە هەمیشە و بەردەوام سوپەر و قەڵغانی رێزی پێشەوەی چین و توێژەكانیتر بوون، لەهەموو ئەو بوارانەی لێیان خوازراوە، بێگومان هەموو ساڵێكی تازەی خوێندن  گرنگی گەورەی خۆی لەژیانی زانستی و هەنوكەیی و داهاتوی كۆمەڵگە هەیە، بۆیە هێناویەتی هەر جارێ بەیاننامەیەكی تایبەتی بۆ دەربكرێت وێڕای دەرخستنی گرنگی ساڵی تازە جەخت لەسەر داخوازیە رەواكانی مامۆستایان و فاكتۆرەكانی باشتر كردنی ئەدای پەروەردە تێدا راگەیاندراوە.
2-     راگەیاندراوەكان : زۆرترین راگەیاندراو لەسەر دۆخی هەستیاری كوردستان بووە، لەو ماوەیەدا بەو هەژمارەی گەلی كوردستان روبەڕوی گەورەترین دوژمنی بۆتەوە، بێگومان هەموو پرسە گرنگەكانی گەلەكەمان لەسەر رێگای هات و نەهات بووە بۆیە بە فەرمی ئەولەویەتی كارەكانی (ی.م) خزمەتی مەسەلە نیشتمانی و نەتەوایەتیەكان بووە لەهەموو بەشەكانی كوردستان، لەهەر شوێنێكی ئەم كوردستانە زەرەرێك بەر گەلەكەمان كەوتبێت راستەوخۆ (ی.م) بە زەرەری خۆی زانیوە بۆیە راگەیاندراوی بڵاوكردۆتەوە هەموو جارێش وێنەیەك لە راگەیاندراوەكانی بۆ رێكخراوە  جیهانیەكان ناردووە بۆ ئەوەی ئەوانیش لە رەوشی پڕ لە ئێش و ئازاری گەلی كوردستان ئاگاداربن .
3-    پڕۆژە و یاداشتەكان:  لەو دوو ساڵەو لە كاریگەری قەیرانی دارایی لەسەر ژیان و گوزەرانی مامۆستایان و فەرمانبەران، (ی.م) لە پەرۆشی ئەوەی ئەم بارودۆخە هەستیارە نەبێـتە لەمپەر لەبەردەم پرۆسەی پەروەردە كە خۆی لەخۆیدا لەمپەرە لەبەردەوام راستە رێ بوونی كۆمەڵگە، هەر بۆ ئەو مەبەستانە پڕۆژە و یاداشتەكان بۆ چاكسازی لەم بوارانە پێشكەش  كراون
أ‌-    بۆ چاكردنی ژیان و گوزەرانی مامۆستایان .
ب‌-    كەمكردنەوەی هەژمونی سیستەمی پاشەكەوتی نایاسایی لەسەر رەوشی ژیانی مامۆستا لە هەردوو وەزارەتی پەروەردە و خوێندنی باڵا .
ت‌-    شێوازی دیاریكردنی بەڕێوەبەری ناوەندەكانی خوێندن .
پ‌-    چالاككردنی سیستەمی سەرپەرشتیكردن، بڕوای(ی.م)بەوەیە،سەرپەرشتیكردن ئەلقەیەكی زۆر گرنگی پرۆسەی پەروەردە و فێركردنە بەڵام زۆر خاوكراوەتەوە، بەو خاویەوە لە ئێستادا ناتوانێت رۆڵی خۆی بگێڕێت، ناكرێت بەمشێوەیەش بمێنێتەوە، دەبێت هۆكارەكانی باشتر رۆڵبینینی زانستیانەی بۆ بگێڕدرێتەوە.
ج‌-    رێكخستنەوەی خوێندنی تایبەت، لەبەر ئەوەی ئەو شێوازە لەخوێندن نەك لە هەرێمی كوردستان لە زۆربەی وڵاتان روبەڕوی رەخنە بۆتەوە، چونكە زیاتر بەلای بزنس دەشكێتەوە نەك ناوەندێكی پەروەردەیی ، هەر ئەوەش وایكردووە یەكێـتی مامۆستایانی جیهانی (EI) هەوڵ بدات چوارچێوەیەكی یاسایی  توند بۆ ئەو ناوەندانە دیاری بكرێت هەروەها هەوڵی ئەوەش دەدات ناوەندە گشتیەكان زۆر باشتر بكرێن لەوەی ئێستا هەیە تاوەكو جیاوازی نێوان دوو شێواز لە خوێندن زۆر كەمتر بكرێتەوە سەرەنجام كەمتر خەڵك چاویان لەسەر خوێندنی تایبەت بێت  .          
ب-پەیوەندیە دەرەكیەكان:- هەروەك لە پێشەكی ئەم بوارە ئاماژەمان پێدا پەیوەندیەكان زۆر پێویستە چونكە زیندووەیەتی هەر رێكخراوێك خۆی لە پەیوەندیە زۆر و زەوەندەكانی دەبینێتەوە بەتایبەت لەگەڵ رێكخراوە هاوشێوەكانی هەروەها ئەو رێكخراوانەش كە كاریگەریان لەسەر بڕیار و راسپاردە جۆراوجۆرەكان هەیە، لەمبارەیەوە (ی.م.ك) لە ژێر رۆشنایی ئەو راستیە هەمیشە هەوڵیداوە زۆرترین پەیوەندی هەبێت لەلایەك بۆ ئەزمون وەرگرتن لەبواری پەرەپێدانی توانای مرۆیی  و رێكخراوەیی لەلایەكیتر بۆ هەر پێشهاتێك پشتیوانی مەعنەوی بەدەست بێت، خۆشبەختانە دوای هەوڵێكی زۆر كەلە (2008)ەوە یەكەم هەنگاوی بۆ هەڵێنراوە ئێستا ئەم یەكێتیە جێگە و پێگەی خۆی لەنێو گۆڕەپانی كاری رێكخراوەیی نێو دەوڵەتی كردۆتەوە لێرەدا بەپێویستی دەزانم ئاماژە بەرۆڵی سەركردەكانی پێش دوازدەمین كۆنگرە بدەم چونكە بەراستی ئەوان یەكەم پردی پەیوەندیان دامەزراندووە، بێگۆمان دوای كۆنگرەش ئەو رێچكەیە پەرەی پێدرا تا ئەم ساتە كە پەلوپۆی زۆرباشی هاویشتوە، رەنگە پرسیارێك لێرە هەبێت رێكخراو پەیوەندی دەرەكی بۆ چیە؟ وەڵامەكەش دروست بەمشێوەیە، هەموو پرس و ئەگەرێك دوو فاكتۆر یان دەیبوكێنێتەوە یان گەشەی زیاتری پێدەدات، یەكەمیان خودیە واتە ئەو رێكخراوە یاخود ئەو دەزگایە چەندی لەتوانادایە و چۆن ئیدارەی بەرنامەكانی دەدات، ئایا شایستەیە و لەكاتی پێویستدا هەڵسوكەوتی زانستیانە دەكات، بەدیوێكیتر تا چەند دەتوانێت دەست و پەنجە لەگەڵ پێشهاتەكان نەرم بكات تا چەندەش چارەسەرەكان دەدۆزێتەوە، دووەمیان دەرەكیە ئەوەش لەبەر یەك راستی هیچ رێكخراوێك لەتوانای دانیە لەگەڵ دروستبوونی كاروبەرنامەكانی وەكو ئەوەی پێویستە بەڕێوەی ببات لەبەرامبەردا دەبێت بەردەوام پەرە بەتواناكانی خۆی بدات ،لەوەشدا ئەوە بۆ هەموو رێكخراوێك پێویستە نەك تەنها بۆ (ی.م).


لەو رێكخراوە رەسەن و گەورانەی (ی.م.ك) پەیوەندی لەگەڵیاندا هەیە : -
1-    الدولیە للتربیە ((Education international)) كە كورتكراوەكەی (EI)یە، ئەم رێكخراوە نوێنەرایەتی مامۆستایان و كارمەندانی بواری پەروەردە و فێركردن لەسەر ئاستی جیهان دەكات، زیاتر لە (401) رێكخراوی مامۆستایان لە 173 وڵات ئەندامن لەو رێكخراوە لەئێستا تێكڕایی ئەندامانی (32) ملیۆنی تێپەڕاندووە، مەڵبەندی سەرەكی لە برۆكسێلە و پێنج هەرێمی هەیە 1- هەرێمی ئاسیا باسیفیك 2- هەرێمی ئەوروپا 3- هەرێمی ئەفریكا 4- هەرێمی كاریبی 5- هەرێمی ئەمەریكای باشور، جگە لەو هەرێمانە لێژنەیەكی عەرەبیش هەیە كە تایبەتە بە وڵاتانی عەرەبی و باكوری ئەفەریكا، یەكێتی مامۆستایانی كوردستان لە (2008)ەوە ئەندامی كارای (EI)یە، لە (2013)بەفەرمی لە هەرێمی ئاسیا باسیفیك بووە ئەندام و سەرۆكی (ی.م.ك) ئەندامی لێژنەی تەنفیزی ئەو هەرێمەیە، (EI) زۆر بەجددی پشتیوانی لە (ی.م) دەكات بەو هەژمارەی رێكخراوێكی ئەكتیفە و حزوری بەردەوامی لە چالاكیە جۆراوجۆرەكان هەیە، لە دەڤەرێكیشە لەلایەك ماوەیەكە فۆكسی جیهانی لەسەرە، بەمدواییە پشتیوانیەكانی (EI) زیاتر بووە لە ژێر رۆشنایی شەڕی تیرۆر و ئەو گۆڕانكاریە خێرایانەی رۆژانە دێتە پێشەوە لەلایەكیتر ژمارەیەكی زۆر ئاوارە هەیە (ی.م) بەردەوام پەیامی ئەو ئاوارانەی گەیاندووە هەروەها كێشەی دواكەوتنی موچە و ئەو پاشەكەوتە نایاساییەی بەرامبەر مامۆستایان كراوە وایكردووە (EI) پەیتا پەیتا چاودێری بارودۆخەكە و دووپاتی بەدواداچونەكانی لە پێشهات و روداوەكان بكاتەوە، لەوەتەی قەیرانی موچە سەری هەڵداوە (3) جار نامەی فەرمیان ناردووە بۆ سەرۆك وەزیرانی عێراق و هەرێمی كوردستان تیایدا داوای بەپەلە چارەسەركردنیان كردووە جەختیان لەسەر ئەوەش كردۆتەوە موچە نابێت تێكەڵاوی سیاسەت بكرێت، لەهەر سێ نامە یەكێـتی مامۆستایانی كوردستانیان دیاریكردووە لەهاوبەشیكردن لە گفتوگۆكان و چارەسەركردنی قەیرانەكان،لە ساڵی (2014) هەندێك یارمەتی ماددیان بۆ ئاوارەكان بەتایبەت خوێندكاران نارد هەر چەندە زۆر نەبوو بەڵام یەكێتی مامۆستایان بە پشتیوانیەكی گەورەی زانی .
2-    گەورەترین یەكێتی مامۆستایانی بەریتانی (NASUWT) ئەو یەكێتیەی مامۆستایان زیاتر لە (300) هەزار ئەندامی هەیە، یەكێكە لە بەهێزترین رێكخراوەكانی جیهان، لەهەموو بوارەكان، كاریگەری لەسەر بڕیاری سیاسی بەریتانیا هەیە، زیاتر بەلای چەپەكانەوە دەشكێتەوە، بەبڕیاری كۆنگرەی خۆیان پشتیوانی تەواو لەو رێكخراوانە دەكەن كە تێدەكۆشن لەپێناوی دیموكراتیەت و دادپەروەری كۆمەڵایەتی بەتەواویەت دژی دكتاتۆریەت و تەپەسەركردنی مافی گەلانن، لەو چوارچێوەیەدا پشتیوانی لە یەكێتی مامۆستایانی كوردستان و كۆمەڵێك رێكخراویتر دەكەن لە دەڤەرەكە كەلە خەباتدان لە پێناو ئەو ئامانجانەی لە پێشەوە باسكران، لەسەروبەندی هێرشی رێكخراوی تیرۆرستی داعش بۆ ئەم دەڤەرە لەیەكەم ساتەوە هاتنەسەر خەت و پەیوەندیان بە (ی.م)و رێكخراوی مامۆستایانی توركیا (( ئێتمسەن)) كرد تاوەكو لەنزیكەوە ئاگاداری روداو و پێشهاتەكان بن و لەهەمان كاتدا هاوكاری ماددی و مەعنەوی پێشكەش بكەن، لەناوەڕاستی (2014) یاداشتێكی فەرمیان لە ژێر ناونیشانی ( كۆبانێ) ئاراستەی وەزارەتی دەرەوەی بەریتانیا كرد، تیایدا داوایان لە حكومەت كرد كە بەشداری بكەن لەهاوكاری كورد لەباشور و كوردستانی رۆژئاوا هاوكات هاوكاری پێویستی ئاوارەكانیش بكەن، ئەوەبوو  وایكرد حكومەتی بەریتانیا لەچوارچێوەی هاوپەیمانی نێو دەوڵەتی بەشداری كارایان لەشەڕی دژی داعشدا هەبێت، لەبواری پەرەپێدانی توانای مرۆیی و رێكخراوەیی بەردەوام پشتیوانی (ی.م.ك) دەكەن بەردەوامیش لە كۆنفراسی ساڵانەیان داوەتی نوێنەرانی (ی.م) دەكەن و دەرفەتی باشیش دەڕەخسێنن تاوەكو لەو دەرفەتەدا سمینار بكەن و پەیامی نەتەوەیی و نیشتمانی بگەیێنن .
3-    فیدراسیۆنی مامۆستایانی ئەمریكا (AFT) ئەو رێكخراوە لە وڵاتە یەكگرتوەكانی ئەمەریكایە و زیاتر لەیەك ملیۆن و پێنج سەد هەزار ئەندامی هەیە و لایەنگری زیاتری دیموكراتەكان دەكەن، رۆڵی باشیان هەبووە لە هاوكاریكردن لە روی پەرەپێدانی (ی.م) لە (2008)ەوە هەبووە و چەند ۆركشۆپ و خولیان بۆ سەركردەكان و كادیرەكان كردووە ، لەگەڵ هاتنی داعش و زەرەرو زیان گەیاندنی زۆر بەخەڵكی كوردستان بەتایبەت ئێزیدیەكان و كریستیانەكان، لەوبارەیەوە بەفەرمی داوایان لەسەرۆكی (ی.م) كرد لەرێگای سكایپەوە بەشداری كۆبوونەوەی مەكتەبی تەنفیزی رێكخراوەكە بكات كە لەنیۆرك لە (14/10/2014) بەڕێوەچو، لەماوەی (17) خولەكدا تەواوی زانیاریەكانیان بۆ رونكردنەوە سەرەنجام زۆر نیگەران بوون لەرەوشەكە، لەزۆری ژمارەی ئاوارەكان هەروەها ئەوكوشت و بڕەی دەرهەق بە هاوڵاتیان لەلایەن داعشەوە ئەنجامدراوە بۆ ئەو مەبەستە بڕیاری ئەوەیان دا فشار بخەنە سەر حكومەتی ئەمەریكا تاوەكو بەتەواویەت شەڕی داعش و كار بۆ بنەبڕكردنی ئەو رێكخراوە تیرۆرستیە بكەن، دوای ئەوەش بەردەوام چاودێری بارودۆخەكەیان كردووە لەنزیكەوەش داوای زانیاری بەردەوامیان لە (ی.م) كردووە لەسەر دۆخەكە و ئاراستەكەی .
4-    هەرێمی ئاسیاباسیفیكی (EI) ئەو هەرێمە یەكێكە لەهەرێمە گرنگەكانی (EI) زیاتر لە (73) رێكخراوی مامۆستایانی كیشوەری ئاسیا ئەندامن تیایدا، بارەگاكەی لە پایتەختی مالیزیا ( كولالامبور)، كۆمەڵێك رێكخراوی گەورەی دەڤەرەكە لەخۆ دەگرێت لەوانە یەكێتی مامۆستایانی یابان (JTU) یەكێتی مامۆستایانی كۆریا (KTU) یەكێتی مامۆستایانی گشتی هندستان یەكێتی مامۆستایانی ئوسترالیا، فلیپین، ئەندەنوسیا، یەكێتی مامۆستایانی كوردستانیش لە (2013)ەوە ئەندامی فەرمی ئەو هەرێمەیە، سەرۆكی (ی.م) ئەندامی لێژنەی تەنفیزی ئەو رێكخراوایە، بەگشتی لە دوو ساڵی رابردوودا پشتیوانیان لە (ی.م.ك) كردووە ئامادەیی خۆشیان نیشانداوە بۆ هەر جۆرە هاوكاری و پێداویستیەك لەبواری پەرەپێدانی تواناكان، بەرنامەشیان هەیە پەرە بەهاوكاریەكان بدەن .
5-    هەرێمی عەرەبی ( البنیە العربیە) ئەوە هەرێمەكە بۆ وڵاتە عەرەبیەكان و باكوری ئەفەریقا لەهەموو كۆڕو كۆبوونەوەكانیان بانگهێشتی نوێنەرانی (ی.م.ك) دەكەن هەماهەنگیەكی باشیان هەیە بەردەوام بەدواداچونیان بۆ رەوشی ئاوارەكان كردووە چەندین جاریش نامەی فەرمی پشتیوانیان ناردووە لەهەوڵەكانیشیان بۆ گەیاندنی ئێش و ئازارەكانی ئاوارەكان بەجیهان كەمتەرخەم نەبوون، لەبواری پەرەپێدانی كاری رێكخراوەیی و پەروەردەیی و مرۆیی هەماهەنگی باشیان كردووە، ئێستا (ی.م) پەیوەندیەكی زۆرباشی لەگەڵ رێكخراوەكانی مامۆستایانی مەغریب ، جەزائیر، تونس، مصر، لوبنان، كوێت، فەلەستین،یەمەن، هەیە بەردەوام نامە و زانیاری لەگەڵ یەكتردا دەگۆڕنەوە لەگەڵ نەقابەی مامۆستایانی عێراقیش باشترین پەیوەندی هەیە و هەمیشە وەك یەك تیم لەبەرامبەر پێشهاتەكان كار دەكەن، لەم دواییە پەیوەندی لەگەڵ كۆمەڵێك رێكخراویتر كراوە لەوانە قوبرس ، پورتوغال، سوید، لەهەوڵەكانیش بەردەوامن بۆ ئەوەی زۆرترین پەیوەندی بكرێت لەسەر ئاستی هەموو جیهان .
3-پەرەپێدانی بواری رێكخراوەیی و مرۆیی: راستە (ی.م.ك)لە(15/5/1962) دامەزراوە، لەو ساوە بەردەوام كاری كردووە، بەڵام لەبواری شارەزایی و نواندنی چالاكی جۆری و شێوازەكانی خەباتكردن زۆری پێویستە، بۆ ئەوەی رێكخراوەكە بەهێز بێت و بەردەوام لەگەڵ قۆناغەكانی خەباتی پیشەیی بەرەو پێشەوە بڕوات، یەكەمیان دەبێت پەرە بەتوانای مرۆیی بدرێت واتا كادیری تازە بهێنرێتە پێشەوە بەتایبەتی كادیری ژن، چونكە بۆ هەموو رێكخراوەكان ژن پێویستە بەو هەژمارەی ژن نیوەی كۆمەڵە و دایكی نیوەكەی ترە لەنێوان مامۆستایانی هەرێمیش رێژەی ژن زیاترە لە پیاوان، دووەمیان دەبێت توانای پیشەیی دەوڵەمەند بكرێت، رێكخراو وەكو فەرمانگەیەكی دیاریكراو نیە چوارچێوەی ئیشكردنی سنوردار بێت بەڵكو رێكخراو وێڕای ریسا گشتیەكانی كاروچالاكی كە خۆی لەیاسا یان پەیرەو پرۆگرام دەبینێتەوە بەرنامەكاریش هەیە هاو زەمان پێشهات و پێویستی هەنوكەیش بەراورد بە زەمەن و قۆناغەكان هەیە، بۆ ئەوە لەئان و ساتی بەرپرسیاریەتی دابیت، بەردەوام پێویستت بۆ خۆ پڕكردنی مەعریفەتی پیشەیی هەیە و ئەبدەیت كردنەوەش زەرورەتێكی حەتمیە، بۆ ئەو مەبەستانە یەكێتی مامۆستایان هەموو دەرفەتەكانی قۆستۆتەوە تاوەكو پەرە بەتوانا مرۆیی و پیشەیی ئۆرگانەكان و كادیرەكان بدات، بەكورتی ئاماژە بەكۆی ئەو هەوڵانە لەماوەی دوو ساڵدا دەدەین :
1-    بەشداریكردن لە كۆڕ و كۆبوونەوە نێو دەوڵەتیەكان :
أ‌-    دوو جار بەشداری كۆنگرەی گەورەترین رێكخراوی مامۆستایانی بەریتانی  ( NASUWT)  كراوە .
ب‌-    چوار جار بەشداری كۆبوونەوەكانی ئەنجومەنی تەنفیزی هەرێمی ئاسیا باسیفیك كراوە لە وڵاتەكانی هندستان، مالیزیا، میانمار بەو هەژمارە سەرۆكی (ی.م.ك) ئەندامی ئەو مەكتەبەیە .
ج- ئامادەبوون لە كۆنگرەی سێهەمی لێژنەی هەرێمی عەرەبی و باكوری ئەفەریقا لە وڵاتی كوێت .
د- ئامادەبوون لە كۆنفراسی ئاوارەكان لەوڵاتی سوید لەسەرداوای (EI) (Lara farbandet) كە دەكاتە سەندیكای مامۆستایانی سویدی .
ه- ئامادەبوون لە دامەزراندنی رێكخراوی عەرەبی بۆ پەروەردە لە وڵاتی لوبنان .
و- ئامادەبوون لەیەكەم كۆبوونەوە رێكخراوە عەرەبی بۆ پەروەردە دوای كۆنگرەی دامەزراندن لە وڵاتی بەحرەین .
2-    ۆركشۆپ و سمینارەكان :
أ‌-    بەشداریكردن لە دوو ۆركشۆپ لە پایتەختی مالیزیا لەسەر داڕشتنی بەرنامەی پۆست (2015)بۆ بەرەو پێش بردنی پرۆسەی پەروەردە و فێركردن .
ب‌-    ئامادەبوونی لە سێ ۆركشۆپی لە وڵاتی لوبنان لەسەر ئەجێندای پۆست (2015) بۆ مەبەستی گفتوگۆكردن لەسەر رەش نوسی پەرەپێدانی پرۆسەی پەروەردە و فێركردن كۆی ئەو ئامانجانەی پۆست (2015) لەچوارچێوەی دروشمی خوێندنی باش بۆ هەموان
تێبینی : لەكۆی ئەو پێنج ۆركشۆپە كۆمەڵێك بنەما دیاریكرا تاوەكو بێتە ئەجێندای پۆست (2015)لەوانە : -
1-    دەستەبەركردنی دەرفەت بۆ هەموو كوڕان و كچان كە بەخۆڕایی و بەباشی لە قۆناغەكانی سەرەتایی و دواناوەندی بخوێنن.
2-    دەستەبەركردنی دەرفەت بۆ هەموو منداڵانی كوڕ و كچ تاوەكو سود لە چاودێری و گەشەی پێویست وەربگرن وەك فێركردنی پێش سەرەتایی بۆ ئەوەی ئامادەی تەواو بن بۆ فێركردنی سەرەتایی .
3-    رەخساندنی دەرفەت بۆ هەموو ژنان و پیاوان تاوەكو لە فێركردنی پیشەیی خوێندنی باڵا و بەخەرجیەكی كەم درێژە بەخوێندن و خۆ بەرهەڤكردن بدەن .
4-    زیادكردنی ژمارەی گەنجان و پیاوان بە رێژەیەكی گەورە بەشێوەیەك كە كارامایی و شارەزای باشیان لە تەكنەلۆژیا و كاری پیشەیی هەبێت بۆ ئەوەی كاری دەست بكەوێت بەتایبەت ئیشی سەربەخۆ .
5-    نەهێشتنی جیاوازی لەنێوان هەردوو رەگەز هەروەها رەخساندنی دەرفەت بۆ ئەوەی سود لەهەموو ئاستەكانی فێركردن و راهێنانی پیشەیی و وەرگرێت بەتایبەتی توێژە كەم تواناكانی تەنانەت ئەوانەی كەمئەندامن یان ئەو منداڵانەی لەبارودۆخێكی لەرزۆكدا ژیان بەسەر دەبەن .
6-    دەستەبەركردنی دەرفەت بۆ هەموو گەنجان و رێژەیەكی زۆر لە گەوران ( ژنان و پیاوان) بەشێوەیەكی یەكسان تاوەكو خوێندن و نوسین و ژمێركاری فێربن .
7-    دەستەبەركردنی دەرفەت تاوەكو هەموو فێربووەكان زانیاری و شارەزایی پێویست لە پەرەپێدانی بەردەوام وەرگرن لە بوارەكانی ژیان، مافەكانی مرۆڤ ، یەكسانی لەنێوان ژن و پیاوان هەروەها بانگەشەكردن بۆ رواندنی رۆشنبیری ئاشتی و دوركەوتنەوە لە توندی و تیژی و رێزگرتن لە ئایین و پێكهاتە جیاوازەكان .
ج- رێكخستنی دوو ۆركشۆپ لەلایەن (EI) و گەورەترین رێكخراوی مامۆستایانی بەریتانی (NASUWT) بەهاوكاری لێژنەی هەرێمایەتی عەرەبی و باكوری ئەفەریقا لەوڵاتی لوبنان هەر جارێ‌ لەو دوو جارە (24) كادیری پێشكەوتوی (ی.م.ك) تیادا بەشداربوون كە بەهەردوو جارەكە دەكاتە (48)كادیر .
د- رێكخستنی سمینارێك لەسەر نەخۆشی شەكرە لەبارەگای مەكتەبی سكرتاریەت .
ه- رێكخستنی سمینارێك بەهاوكاری كتێب دۆسان لە مەكتەبی سكرتاریەت لەسەر گرنگی خوێندنەوە .
و- رێكخستنی سمینارێك لەسەر ئاسایشی ئابوری لە سكرتاریەت .
ز- رێكخستنی خولێك بۆ (24) كادیری لقەكان لەبارەگای سكرتاریەت لەسەر پەرەپێدانی توانای مرۆیی بەناونیشانی ( خوێندنەوەیەك بۆ داتاكان و كاری لە پێشینەی یەكێتی مامۆستایان).
ح- رێكخستنی ۆركشۆپێك بۆ مامۆستایانی زانكۆ كە تیایدا  بەڕێز وەزیری خوێندنی باڵا و نوێنەری هەموو زانكۆكانیش ئامادەبوون لەژێر ناونیشانی ( پاشەكەوتی موچە و دەرەنجام و پەرەپێدانی توانای زانكۆكان)
  گ- رێكخستنی ۆركشۆپێك بەهاوكاری رێكخراوی یونسیف بەبۆنەی رۆژی جیهانی مامۆستایان و پێویستیەكانی پرۆسەی پەروەردە و فێركردن .
ی- بەشداریكردن لە كۆنگرەی پەروەردەیی، تیایدا لەلایەن سەرۆكی یەكێتی مامۆستایانەوە وتارێكی چڕو پڕ لەسەر دۆخی پەروەردە و چۆنیەتی چارەسەركردنی كێشەكان پێشكەشكرا.
ك- بەشداریكردن لەچەندین بۆنەی نیشتمانی و نەتەوایەتی هەروەها رێورەسمی رێزلێنان لەمامۆستا دێرینەكان .
ل- رێكخستنی چەندین سمینار و رێو رەسمی رێزلێنان لەلایەن لقەكانەوە بەبۆنەی ساڵ رۆژی دامەزراندنی (ی.م.ك) هەروەها جەژنی مامۆستایانی جیهان و كوردستان .
4-دارایی و دەستەبەری و هاوكاریە جۆراوجۆرەكان:
أ‌-    هاوكاریەكان:
1-    بەپێی ئیمكانیاتی دارایی رەخساو، مەكتەبی سكرتاریەت وێڕای هەڵمەتی خوێن بەخشین بۆ هێزی پێشمەرگەی كوردستان چەند جارێكیش هاوكاری ماددی كردووە، لەوانە مامۆستایانی قوتابخانەی ئاوارەكانی كوردستانی رۆژئاوا لەسمێل، هاوكاری ئاوارەكانی شەنگال لە ئۆردوگای شاریا هاوكاری ئاوارەكانی موسڵ، هەروەها هاوكاری قوتابیان بەشێك لەقوتابخانەكانی مەخمور كە كۆی هاوكاریەكان زیاتر لە (14.400.000) چواردە ملیۆن و چوارسەد هەزار دینار بووە. راستەوخۆ لەلایەن مەكتەبی سكرتاریەتەوە لەسەر داوای لقەكان بڕی (12.500.000)هاوكاری مامۆستایان كراوە بۆ لەچاپدانی بەرهەمی ئەدەبی و پەروەردەیی و وێژەیی هەروەها كارەساتی لەناكاو و نەخۆشی جۆراوجۆر .
2-    بڕی (13.801.500) هاوكاری لقەكان كراوە بۆ كرێی بارەگاو هەندێك پێداویستیتر .
3-    بڕی (8) ملیۆن دینار بۆ رێكخستنی سمینار و ۆركشپۆپەكان خەرجكراوە .
ب-هاوكاری لقەكان: لقەكان لەلایەن خۆیانەوە بەپێی ئەو بڕە پارەی كەلە كۆكردنەوەی ئابونە لەبەر دەستیان بووە هاوكاری جۆراو جۆریان پێشكەشكردووە لەوانە :  
هاوكاریكردنی هێزی پێشمەرگە و ئاوارە، پێویستە بوترێ هێزی پێشمەرگە هەمیشە و بەردەوام پارێزەری سەروماڵی كۆمەڵانی خەڵكی كوردستان بووە، لە شەڕی روبەڕوبوونەوەی تیرۆرستان گەورەترین داستانیان تۆماركردووە بەشێوەیەك ئەگەر ئەو هێزە نەبوایە كوردستان گیرۆدەی تیرۆرستان دەبوو بگرە سەروماڵیش تێدەچو، هەر ئەو هێزەش ئارامی و ئاسایشی بەخشیوە تاوەكو لەسایەوە پرۆسە و پەروەردە و فێركردن و هەموو جومگەكانیتری ژیان بەردەوام بێت، لەم رەوانگەیەوە بە بڕیاری ئەنجومەنی تەنفیزی داوا لەهەموو لقەكان كرا كە هەر چی دەكرێت بۆ هێزی پێشمەرگە و ئاوارەكانیش بیكەن بۆیە لقەكان بە ئەركی خۆیان هەڵسان بەردەوامیشن لێی ، تا هەنوكە:
1-چەند جارێك هەڵمەتی خوێن بەخشینیان كردووە.
2-لقەكانی ( هەولێر،دهۆك،كەركوك، خانەقین،سلێمانی،گەرمیان،راپەڕین) كەلوپەلی پێداویستی و خۆراكیان گەیاندۆتە سەنگەرەكانی پێشەوەی هێزی پێشمەرگە .
3-زۆربەی ئەندامانی لقی موسڵ بەهۆی كاریگەری راستەوخۆی هێرشی تیرۆرستان، زۆربەی ئەندامانی ئەنجومەنی لق راستەوخۆ بەشداری شەڕی روبەڕوبوونەوەی تیرۆرستانیان كردووە تاهەنوكەش بەردەوامن.
5-دەستەبەری : بەپێی یاسای ژمارەی (1)ی ساڵی (2012)هەمواركراوی یاسای ژمارە (4)ی ساڵی (2002) یەكێتی مامۆستایانی كوردستان بەشی چوارەم (دارای یەكێتی ) ماددەی (16) بڕگەی (یەكەم -1 – أ ) لەكۆی ئەو ئابونەی كۆ دەكرێتەوە (70%) دەچێتە سندوقی دەستەبەری، ئەو دەستەبەریەش ریساكانی خەرجكردنی لەلایەن كۆنگرەی گشتیەوە دیاری دەكرێت لێژنەیەكیش رادەسپێرێت بەناوی لێژنەی دەستەبەری  بۆ سەرپەرشتیكردنی خەرجكردن، دوای ئەوەی لەلایەن ئەنجومەنی لقەوە بڕیاری لێوە دەدرێت، لقەكانی یەكێـتی مامۆستایان لەساڵەكانی (2015-2016) بەبڕیاری ئەنجومەنی تەنفیزی كە ئەویش پشت بەست بووە بەیاسای ئاماژەپێكراو (25000) بیست و پێنج هەزار دیناریان ئەندامیەتیان وەرگرتوە، واتە لەو دوو ساڵە مانگانە دەكاتە كەمتر لە یەك هەزار دینار لەبەر ئەوەی لەو (25)هەزارە دوو هەزاری بۆ نوێكردنەوەی هەویەكان بووە، سەرباری ئەوەش لقەكان بەشێوەیەكی رێكوپێك بەپێێ‌ بنەما یاساییەكان مامەڵەیان لەگەڵ ئەو بڕە كردووە كەلە سندوقی دەستەبەری بووە لەم دوو ساڵە ئەو هاوكاریانەیان پێشكەشكردووە كە بەراورد بە پارەكە و ژمارەی مامۆستایان بەكارێكی باش لێكدەدرێتەوە.
لقەكان                     كۆی هاوكاری لەبوارەجۆراوجۆری دەستەبەری                   ژمارەی مامۆستای سودمەند
هەولێر                                    188.565.000                                                       1318
دهۆك                                      110.000.000                                                       780
سلێمانی                                   39.768.000                                                        233
خانەقین                                  37.730.000                                                        251  
راپەڕین                                   18.950.000                                                         175
كەركوك                                   78.045.600                                                        233
سۆران                                      14.565.000                                                        93
ئاكرێ                                      11.850.000                                                         81
كۆیە                                       11.900.000                                                         99
هەڵەبجە                                   7.022.800                                                         78
گەرمیان                                   2.782.000                                                         32    
                                            521.178.400                                                       3373
تێبینی / لقی موسڵ بەهۆی بارودۆخی تایبەتەوە نەیتوانیوە بە بنەماكانی كەلە دەستەبەری داهاتووە مامەڵە بكات
یەكێتی مامۆستایان لە بواری دەستەبەری و هاوكاریدا بەرنامەی زۆرباشی داڕشتبوو بەڵام بەهۆی ئەو بارودۆخە نەخوازراوەی روبەڕوی هەموو لایەك بۆوە بەتایبەت مامۆستایان وایكرد كە بڕی داهات كەم بێت نەتوانرێت وەكو پێویست بەرنامەكە جێبەجێ بكرێت، ئومێدی زۆرمان بە پشتگیری مامۆستایانە، لە داهاتودا كە ئەم دۆخە چارەسەر دەبێت باشتر هاوكاریەكان بەرجەستە بكرێت ، لەئێستاشدا لەسەروبەندی نوێكردنەوەی پرۆسەی ئەندامیەتین هەر كاتێك بارودۆخەكە گونجاو بوو جارێكیتر دەست بەهاوكاریەكان دەكرێتەوە بەپێی توانای دارایی بەردەست .

سەركەوتن بۆ كاری رێكخراوەیی
سەركەوتن بۆ یەكێـتی مامۆستایانی كوردستان
لەپێناو خزمەتكردنی پرۆسەی پەروەردە و
فێركردن و ژیانێكی شایستەتر بۆ مامۆستایان .

                                                                                                                                           ئامادەكردنی
                                                                                                                                  عبدالواحد محمد حاجی
                                                                                                                                        سەرۆكی (ی.م.ك)
                                                                                                                                             15/1/2017



بەڕێوەبەرایەتی ڕاگەیاندنی وەزارەتی خوێندنی باڵا و توێژینەوەی زانستی

د.یوسف گۆران وەزیری خوێندنی باڵا و توێژینەوەی زانستی ڕایگەیاند: سەرۆکی حکومەتی هەرێمی کوردستان ڕەزامەندی نیشاندا لەسەر خەرجکردنی بڕی (٣٠) ملیۆن دۆلار بۆ خوێندکارانی تواناسازی.

ئەو ڕاگەیاندنەی وەزیری خوێندنی باڵا و توێژینەوەی زانستی ئەمڕۆ دوشەممە، ڕێکەوتی (٦/٣/٢٠١٧) لە میانەی کۆنگرەیەکی ڕۆژنامەیدا هات، کە بۆ دامەزراوەکانی ڕاگەیاندن لە هۆڵی ڤیدیۆ کۆنفرانسی دیوانی وەزارەت ڕێکخرابو.

لەو چوارچێوەیەدا و، لەسەرەتای کۆنگرە ڕۆژنامەیەکەدا، د.یوسف گۆران وتی: وەک ئاشکرایە لەگەڵ سەرهەڵدانی قەیرانی دارایی یەکێک لەو سێکتەرانە کە دوچاری قەیرانی دارایی بوە، خوێندنی باڵا و، بەتایبەت خوێندکارانی تواناسازی بو، بۆیە هەر لەسەرەتاوە ئێمە ئاگاداری وردەکاری هەمو کێشەکانیان بون و، بەردەوام بەدواداچونمان بۆیان دەکرد، ئەوەبو لە قۆناغی یەکەمدا توانیمان بڕی نیو ملیۆن دۆلاریان بۆ پەیدا بکەین، بەوەش توانرا بەشێک لە کێشەکانیان چارەسەر بکەین، چونکە بڕی پارەکە زۆر کەم بو.

وەزیری خوێندنی باڵا و توێژینەوەی زانستی جەختی لەسەر ئەوەش کردەوە، وەزارەت لە هەوڵ و کۆششەکانی بەردەوام بو بۆ ئەوەی شایستە داراییەکانی خوێندکارانی تواناسازی دابین بکات، خۆشبەختانە ئەمڕۆ دوشەممە، ڕێکەوتی (٦/٣/٢٠١٧) سەرۆکی حکومەت ڕەزامەندی نیشاندا بەتەرخانکردنی بڕی (٣٠) سی میلۆن دۆلار بۆ خوێندکارانی تواناسازی بەتایبەت ئەوانەی ئێستا لە پڕۆسەی خوێندندان، د.یوسف گۆران ئەوەشی ڕاگەیاند بەتەرخانکردنی ئەو بڕە پارەیە کێشەی هەر زۆری ئەو خوێندکارانەی تواناسازی چارەسەر دەکات کە ئێستا دەخوێنن.

لە بەشێکی دیکەی قسەکانیدا، وەزیری خوێندنی باڵا و توێژینەوەی زانستی ئاشکرایکرد، ئەو بڕە پارەیە بە سێ جار و، هەر مانگەی بڕی (١٠) ملیۆن دۆلار دێنە سەر حیسابی وەزارەت، لەهەمان کاتدا بەو پێیی فەرمانەکەی سەرۆکی حکومەتی هەرێمی کوردستان لێژنەیەکی سێ کەسی بەسەرۆکایەتی  (وەزیری خوێندنی باڵا و توێژینەوەی زانستی و، بەڕێوەبەری گشتی فەرمانگەی نێردراوان و پەیوەندییە ڕۆشنبیرییەکان و، بەڕێوەبەری ژمێریاری وەزارەتی خوێندنی باڵا)، بۆ ئەوەش وەزیری خوێندنی باڵا و توێژینەوەی زانستی ڕایگەیاند: لە وەزارەت میکانزمی گونجا دادەنینین و، لەگەڵ سەرجەم ئەو زانکۆیانەش گفتوگۆ دەکەین کە خوێندکاران تێیاندا دەخوێنن بۆ ئەوەی بڕی پارەکانیان بۆ ڕەوانە بکەین، واتا لەم پڕۆسەیەدا خوێندکار پەیوەندی بەپێدانی کرێی خوێندنی بەزانکۆ نابێ، بەڵکو وەزارەت خۆی ئەو کارە ڕایی دەکات، لەوەشدا د.یوسف گۆران مژدەی بەخوێندکارانی تواناسازیدا کە ژمارەیان (٨٠٠) خوێندکارە کێشەکانیان چارەسەر کرا.

هەر لەو کۆنگرەیە ڕۆژنامەیەدا د.یوسف گۆران وەزیری خوێندنی باڵا و توێژینەوەی زانستی سوپاسی هەمو ئەو لایەن و لێپرسراوانەی کرد، کە هاریکاریانبون بۆ چارەسەرکردنی کێشەی شایستە داراییەکانی خوێندکاران، لە پێشەوەیان سەرۆک و جێگری سەرۆکی حکومەتی هەرێمی کوردستان، سکرتاریەتی ئەنجومەنی وەزیران، وەزارەتی دارایی و ئابوری و، بەڕێوەبەرە پەیوەندارەکان لە دیوانی وەزارەت، کە هەموان پێکەوە لەو پرۆسەیە بەشدار  و هاوکار بون بۆ تەرخانکردنی ئەو بڕە پارەیە.

 لە کۆتایدا، وەزیری خوێندنی باڵا و توێژینەوەی زانستی ڕایگەیاند: لەم مانگەوە دەست بەچارەسەرکردنی ئەو کێشەیەی خوێندکاران دەکەین، چونکە لە ڕابردودا ئەو کێشەیە ناوبانگێکی خراپی بۆ ئێمە دروست کردبو، بەڵام لێرە بەدواوە هەنگاوی باشتر لەگەڵ زانکۆکان دەچینە پێشەوە، بەشێوەیەک هەوڵ دەدەین پڕۆژەی هاوبەشیشمان هەبێ.

کلیک لێرە بکە بۆ بینینی دەقی فەرمانەکەی سەرۆکایەتی ئەنجومەنی وەزیران بۆ تەرخانکردنی بڕی (٣٠) ملیۆن دۆلار بۆ خوێندکارانی تواناسازی...

 

گروپی کیژانی شێوەکارانی کفری بەھاوبەشی کۆلێژی ھونەرە جوانەکانی زانکۆی سلێمانی و ژمارەیەک خانمە ھونەرمەندی شاری سلێمانی بەبۆنەی ٨ی مارس رۆژی جیھانی ژنانەوە و لەژیر دوشمی ژن و رەنگ و ئازادی سێینەیەکی لێکدانەبڕاون لە گەلەری کفری بەڕێوەچوو.

لەسەرەتای پێشانگاکەدا 'م.گولٓالە حەمید' سەرۆکی گروپی کیژانی شێوەکارانی کفری لە وتەیەکدا ڕایگەیاند "سڵاو لە پێَشمەرگە.. سڵاو لە ٨ی مارس و تەواوی ژنانی دونیا.. پیرۆزە ٨ی مارس رۆژی جیھانی ژنان..ئامادەبووانی بەڕێز زۆر بەگەرمیی بە خێرھاتنی ھەموو لایەکتان دەکەین، سوپاسی ئامادەبوونتان دەکەین، بەتایبەت ئەو میوانانەی رێگایەکی دووریان بڕیوە.

بەڕێزان بێئەوەی درێژەی پێبدەین لەماوەی رابردوودا وەک گروپی کیژانی شێوەکاری کفری توانیومانە کۆمەڵێک کارو چالاکی چۆنایەتی ئەنجام بدەین، کە بەرای زۆرینەی ھونەرمەندان و ھونەردۆستان جێگای ھەڵسەنگانی ئەرێنی بووە، ئەم پێشانگایەش کە (٥٥) شێوەکار لە شارە جیاجیاکانی کوردستان بەشداربوونە، دەکاتە ٣یەمین پێشانگای گروپەکەمان، سەرەڕای کردنەوەی خول و سازدانی ژمارەیەک سیمیناری زانستی، بڕیارمان وایە ئەم ڕێرەوە بۆ برەودان بە ھونەر و جوانی و داھێنان درێژە پێبدەین.ۆلەماوەی داھاتوودا بەھاوکاری پەلەمانتارانی کورد پێشانگایەک بۆ بەرزراگرتنی یاد و بیرەوەری ئەنفال دەبەینە ھۆڵی پەرلەمانی عێراق و تاوەکو تراژیدیا و مەینەتیەکانی میللەتەکەمان لەرێگەی ھونەرەوە ئاراستەی عەقل و روحی نوێنەرانی ئەو دەوڵەتە بکەین کە بەرپرسە لە جینۆسایدکرنمان، ھەروەھا چەندین پرۆژەو کارو چالاکی ترمان لە پێشە.. لێرەشەوە بە ئێوەی ئازیز و خەڵکی پەرۆشی ھونەر و داھێنان رادەگەیەنین، گروپەکەمان روولەبەر فراونییە چ لە رووی چەندایەتییەوە چ لە رووی نەوعییەوە. ھەڵبەتە ئەم کاروانە سەرکەوتوەی ئێمە بەبێ ھاوکاری و یارمەتیدانی چەندین دەزگاو کەسایەتی خەمخۆر و خۆنەویست نەیدەتوانی درێژە بکێشێ و بەردەوام بێت دیارترینیان رێکخراوی ھاوکاری ئەڵمانی و ئیدارەی گەرمیان و قایمقامیەتی قەزای کفری و شارەوانی کفری و بەڕێوەبەرایەتی گشتی رۆشنبیری گەرمیان.. لێرەشەوە لە ناخی دڵەوە سوپاسیان دەکەین.. فەرموون ئێستاش پێشانگاکە لەلایەن خانمە شێوەکار "ئەفراح خان" دەکرێتەوە، ئەم خوشکە ئازیزەمان وێرای ئەوەی خاوەن پێداویستی تایبەتە کەچی بەداھێنانە جوانەکانی سەرساممان دەکا..

به‌ ناوی ئه‌ندامانی مه‌كته‌بی سكرتاریه‌ته‌وه‌ پرسه‌و سه‌ره‌خۆشی خۆمان ئاراسته‌ی به‌ڕێز مامۆستا هادی ئه‌ندامی لقی شارباژێری یه‌كێتیی مامۆستایان ده‌كه‌ین به‌ بۆنه‌ی كۆچی دوایی برای به‌ڕێزتان، داواكارین له‌ یه‌زدانی مه‌زن ره‌حمه‌تی براتان به‌ به‌شتی به‌رین شاد بكات و سێبوری و دڵنه‌وایی خانه‌واده‌كه‌شتان بدات.

 

انا لله وانا اليه راجعون 

یه‌كێتیی مامۆستایانی كوردستان

مه‌كته‌بی سكرتاریه‌ت

5/3/2017

Education union members in Kurdistan’s Iraqi region have shown their willingness, through a joint teachers’ and students’ art and handicraft exhibition, to work together towards building peace and understanding across their region and country.

 

بەمەبەستی گفتوگۆكردن لەسەر كۆمەڵێك پرسی پەروەردەیی و كاری رێكخراوەیی گرنگ، ئەنجومەنی تەنفیزی یەكێتی مامۆستایانی كوردستان (21)ەمین كۆبوونەوەی خۆی بەئامادەبوونی سەرۆك و هەر دوو جێگر و ئەندامانی مەكتەبی سكرتاریەت و سەرۆكی لقەكان بەڕێوەچوو، لە كۆبوونەوەكەدا ئەم بڕگە و بابەتانە بە وردی قسەوباسیان لەبارەیەوە كرا بڕیاری پێویستیشیان لەبارەیەوە درا:

1- یادی (8) ئادار و ساڵڕۆژی ژنان : لەمبارەیەوە بەیاننامەی (EI) بەم بۆنەیەوە خوێندرایەوە،جەخت لەسەر ئەوەكرایەوە دەبێت ئۆرگانەكانی (ی.م) هەوڵی تەواو بدەن لەپێناو بەرزراگرتنی ئەو رۆژە بەرێكخستنی سمینار یان رێوڕەسمی رێزلێنان بۆ مامۆستایانی ژن، لەهەمان كاتیشدا سەردانی ناوەندەكانی خوێندن بكرێت بەتایبەت ئەوانەی بەڕێوەبەرەكانیان لە رەگەزی مێینەن . 

2- بەرنامەی یەكێتی مامۆستایانی جیهانی (EI) بۆ پۆست(2015)، بەتایبەت ئامانجی (4) لەو (17) ئامانجەی نەتەوە یەكگرتوەكان لە ئەیلولی (2015) پەسەندكردووە، لەمبارەیەوە (EI) نیگەرانی خۆی دەربڕیوە لەسەر ئەوەی (UN) لە تەمموزی (2017) كۆبوونەوەی تایبەت بۆ بەدواداچون بە كۆمەڵێك لە ئامانجەكان دەكات، بێ ئەوەی بەرنامەی پەروەردەیی خستبێتە نێو بەرنامەی كۆبوونەوەكە كەلە هەمویان گرنگترە چونكە هەر بە پەروەردەیەكی تەندروست كۆمەڵێك دیاردەی نامۆ چارەسەر دەبێت، یەكێتی مامۆستایانیش بۆ ئەو مەبەستە هەوڵەكانی خۆی دەخاتە گەڕ لەگەڵ حكومەتی هەرێم تاوەكو كاربكات لەپێناو كاركردن لەسەر ئامانجی (4) . 

3- دیاریكردنی دروشمی یەكێتی مامۆستایانی كوردستان بەمشێوەیە (( یەكێتی مامۆستایانی كوردستان بڕوای تەواوی بەوە هەیە مسۆگەركردنی دوارۆژێكی باش لەنێو پۆلەكان و لەسەر دەستی مامۆستایانەوە دەبێت)) 

4- هەڵوێستەكردن لەسەر نیگەرانیەكانی مامۆستایان لەمەڕ درێژەكێشانی پرۆسەی پاشەكەوتی نایاسایی لە موچەكانیان لەمبارەیەوە ئەنجومەنی تەنفیزی بەباشی زانی راگەیاندراوێك بڵاوبكاتەوە كە تیایدا جەخت لەسەر ئەوە بكرێتەوە زۆر پێویستە حكومەتی هەرێم بەزوترین كات پێداچونەوە بە پاشەكەوتی مووچەی مامۆستایان بكات . 

5- بەهۆی زیاد بوونی حاڵەتی هاوسەرگیری پێشوەختە لەنێو قوتابیان و خوێندكاران، ئەنجومەنی تەنفیزی بڕیاری ئەوەی دا بەدواداچون بۆ ئەو بابەتە بكات و لەچوارچێوەی توێژینەوەیەك كە هۆكارەكان و رێگا چارەكان دیاری بكرێن . 

6- گفتوگۆ لەسەر ئەو كۆنگرەیە كرا كە (EI) بەنیازە بۆ ئاوارەكان لەعێراق بەگشتی و لە هەرێمی كوردستان بەتایبەتی بە بەشداری یەكێتی مامۆستایانی كوردستان و نەقابەی مامۆستایانی عێراق لە كۆتایی مانگی نیسان بەڕێوەی ببات،لەمبارەیەوە ئەنجومەنی تەنفیزی ئامادەیی نیشاندا بۆ سەرخستنی كۆنگرەكە،هەروەها ئەو بابەتانەش دیاریكرا كە پێویستە لەو كۆنگرەیەدا لێكۆڵینەوە بەدواداچونی بۆ بكرێت .

7- بۆ رێكخستنی ئیشوكارەكانی یەكێتی مامۆستایانی كوردستانیش كۆمەڵێك بڕیار و راسپاردە گەڵاڵە كرا بۆ ئەوەی لە ئایندەدا جێبەجێ بكرێت . 

كۆبوونەوەكە دوای پێنج كاتژمێربەسەركەوتویی كۆتایی هات . 

یەكێتی مامۆستایانی كوردستان 

ئەنجومەنی تەنفیزی 

شەممە 25/2/2017 

 

Image may contain: 2 people, people sitting, living room, table and indoor

 

 

 

Image may contain: 3 people, people sitting, table and indoor

هەموومان دەزانین ئەم گەلە بەشمەینەتە لە 1921 ەوە خوێن لە جەستەیدا دەچوڕێت، دوژمنانیش حەزە شەڕانگێزەكانی خۆیان پێ تێر كردووە ، لێ‌ لە كوردان قارەمانی، لەوان شەڕو وەیشومە ، سەرەنجام راپەڕین و سەركەوتن، پیرۆز بێت لە دایكی شەهیدان ، لە روحی شەهیدان ، لە شەهیدە زندووەكان، لە هەموو ئەو پێشمەرگانەی لەوساوە تا هەنوكە مەشخەڵی ئەو راپەڕینەیان بەرز راگرتوە بۆ ئەوەی تا دوا مەنزڵ بیبەن.

شەكاوە بێت ئاڵای راپەڕین 

بە كوێرایی چاوی داگیركەران و پیلان گێڕان

عبدالواحد محمد حاجی

سەرۆكی یەكێتی مامۆستایانی كوردستان

5-3-2017